Պարեկներն աջ ու ձախ տուգանում են ամեն ինչ կորցրած արցախցիներին. Մելիքյան

Փաստաբան Ռուբեն Մելիքյանն ահազանգում է.

« Արդեն երրորդ ահազանգն եմ ստանում այն մասին, որ ամեն ինչ կորցրած արցախցիներին պարեկները 100 հազար դրամ տուգանում են՝ ԱՊՊԱ պայմանագիր չունենալու պատճառով…

Է՛ս ա եվրոփարիսեցիների հոտնկայս ծափահարություններին արժանացած «ժողովրդավարությունը»։

ԼՐԱՑՈՒՄ. Գրառումը կատարելուց հետո ինձ մեսինջերով տեղեկացրեցին ևս 4 նման դեպքերի մասին։ Փաստորեն համատարած, աջ ու ձախ տուգանում են»,-գրել է փաստաբանը։

Ի դեպ, թեման լայն արձագանք է գտել, խնդրի մասին գրել է նաև արցախցի փաստաբան Ռոման Երիցյանը և հրապարակել տեսանյութ.

«Քիչ առաջ տեղեկացա, որ այսօր ՀՀ պարեկային ծառայության կողմից երկու արցախցիներ 100 հազար ՀՀ դրամի չափով վարչական պատասխանատվության են ենթարկվել՝ առանց ԱՊՊԱ պայմանագրի տրանսպորտային միջոց վարելու համար։

Ընդ որում՝ վարչական պատասխանատվության են ենթարկվել այնպիսի անձինք, որոնք ՀՀ տարածքում չունեն անգամ ժամանակավոր բնակության վայր, աշխատանք կամ եկամտի այլ աղբյուր։ Պարեկային ծառայողները վարչական պատասխանատվության ենթարկելիս հաշվի չեն առել անգամ իրավախախտի կողմից իր երեխային հիվանդանոց տեղափոխելու հանգամանքը։

Ավելին՝ երեկ վարչական պատասխանատվության ենթարկվեց մեկ այլ քաղաքացի, որն այրվածքների հետևանքով եղբոր մահվան լուրը լսելուց հետո Սևան քաղաքից երթևեկում էր Երևան՝ «Արմենիա» ՀԲ կենտրոն։

Փաստորեն, Հայաստանի Հանրապետությունը՝ ի դեմս ներկայիս գործադիր իշխանության, ՀՀ քաղաքացու անձնագիր կրող արցախցու վրա դնում է այնպիսի պարտավորություն, որը փաստացի հնարավոր չէ կատարել։ Այլ կերպ, բռնի տեղահանված, գործազուրկ և անգամ կեցության համար գումար չունեցող քաղաքացին այս պահին ևս կրում է ԱՊՊԱ պայմանագիր կնքելու պարտավորություն՝ իսկ դրա չկատարումն անվերապահորեն հանգեցնում է վարչական պատասխանատվության։

Իհարկե, որոշ անձինք նման դեպքում կարող են կարծիք արտահայտել, որ եթե քաղաքացին ի վիճակի չէ կնքել ԱՊՊԱ պայմանագիր, ապա թող նաև մեքենա չվարի, սակայն այս դեպքում պետք է հաշվի առնել, որ ներկա պահին արցախցիների ծանրակշիռ մասը չունի անգամ վառելիքի համար նախատեսված անհրաժեշտ դրամական միջոցներ, ինչից հետևում է, որ վերջիններս մեքենա են վարում միայն խիստ անհրաժեշտության դեպքում (հարազատների որոնում, իրերի տեղափոխում, բուժհաստատություն շտապ ժամանում և այլն)։

Ասածս այն է, որ նման քաղաքականություն վարելն այս փուլում ավելի քան վաղաժամ է, իսկ եթե նման քայլերով պատասխանատու անձինք հետապնդում են այլ նպատակ (օրինակ՝ վարչական պատասխանատվության ենթարկելով պարտադրել քաղաքացուն կնքել ԱՊՊԱ պայմանագիր, որպեսզի հնարավոր վթարների դեպքում վերջինիս բեռը թեթևանա), ապա սկզբնական շրջանում, օրինակ, թող հատկացնեն լրացուցիչ միջոցներ՝ ԱՊՊԱ պայմանագիր կնքելու համար։ Ամեն դեպքում ընտրված միջոցը, ըստ իս, անմարդկային է ու վատագույն»,- գրել է Երիցյանը: