Իշխանությունը, որը հանգեցրել է պետության կենսական շահերի կորստին, դատապարտված է լինելու հեռացման․ Արշակ արքեպիսկոպոս․ 168․am

Մայր Աթոռ Սուրբ Էջմիածնի դիվանապետ Գերաշնորհ Տեր Արշակ արքեպիսկոպոս Խաչատրյանն Արցախի և Հայաստանի շուրջ ստեղծված բարդագույն իրավիճակում առաջնային է համարում համազգային համախմբումը։ Ըստ սրբազան հոր՝ այս համախմբումն ապահովելու համար առաջնային մանդատով օժտված է իշխանությունը, որը, սակայն, դա չի անում։ «Իր հերթին՝ համախմբման է գնում նաև Հայ Առաքելական եկեղեցին՝ փորձելով համախմբումն ապահովել քրիստոնեական հավատքի, ազգային արժեքների, ազգային ինքնության, կամ, որ նույնն է՝ գերագույն ազգային շահերի շուրջ։ Նման նպատակի շուրջ համախմբումը, սակայն, շատ դժվար է, երբ պետական ինստիտուտները դրան միտված քայլեր չեն անում, ավելին՝ գնում են դրան հակադրվելու ճանապարհով»,- 168TV-ի «Ռեվյու» հաղորդաշարի եթերում ասել է Արշակ արքեպիսկոպոս սրբազանը։

Նրա խոսքով՝ երբ հայկական երկու պետությունները կանգնած են կործանման եզրին, համախմբման առանցքը պետք է լինի ազգապահպանությունը, այդ նպատակով պայմանավորված՝ ազգի կենսատարածքի պահպանությունը, ուստի դժվար է համախմբվել այն  իշխանության հետ, որը դա չի անում, թեև եկեղեցին բազմաթիվ փորձեր արել է, դժբախտաբար, արդյունք չտալով, քանզի իշխանության մոտեցումը եղել է ոչ թե պետության կենսատարածքի պահպանությունը, այլ՝ հանձնումը։

««Արցախը հանձնենք՝ հանգիստ ապրենք» թեզը չափազանց վտանգավոր է։ Այդ թեզին հետևելու են նոր պարտվողական թեզեր՝ օրինակ՝ կրոնափոխ լինենք, որ լավ ապրենք, երկիրը հանձնենք, որ լավ ապրենք, երկիրը լքենք, որ լավ ապրենք»,- ասել է Արշակ Սրբազանը՝ հավելելով՝ եթե նպատակ է հռչակվել լավ ապրելը, ապա լավ ապրելու համար պետության կենսատարածքը զիջելով՝ իրականում ոչ թե լավ են ապրելու, այլ գոյատևելու են։

«Ուշագրավ է, որ իշխանությունը, որը կոչված է լուծումներ առաջարկելու՝ մարդկանց մոտ վստահություն չի ներշնչում, մարդիկ չեն հավատում, որ չհանձնվելու համար բավարար ջանք է գործադրվում իշխանության կողմից»,- ասել է սրբազանը՝ ընդգծելով՝ գործելու համար առաջնային մանդատ ունեցող իշխանությունը դրա փոխարեն՝ իր պարտությունը պայմանավորում է դավաճանությամբ։

«Մինչդեռ պարտությունը հիմնականում դավաճանության հետ կապելը, կամ դավաճանությունը պարտության միակ պատճառը դարձնելը սեփական անզորության խոստովանությունն է՝ իշխանությունների կողմից։ Եթե կան դավաճանական դրսևորումներ, նշանակում է՝ իշխանությունները չեն կարողացել այդ դավաճանական դեպքերը կանխարգելել։ Գիտե՛ք, դավաճանությունն ամենածանր մեղքերից մեկն է և դավաճանություն է նաև ազգային ինքնության ուրացումը»,- ասել է Արշակ սրբազանը՝ ընդգծելով, որ ազգային արժեքներին դեմ գնացած և գնացող ցանկացած իշխանություն դատապարտված է հեռացման։

«Ցանկացած իշխանություն, որն ունի մարդկանց վրա ազդեցություն գործելու միջոցներ, կարող է գոյատևել ամենացածր վարկանիշի պարագայում։ Խնդիրն այստեղ այն է, որ այն իշխանությունը, որը հանգեցրել է պետության կենսական շահերի կորստին, արժեքների ուրացման, անկախ իր վարկանիշից, դատապարտված է լինելու հեռացման։ Եկեղեցու առաքելությունն իր արդյունքները պիտի տա։ Եկեղեցին կանի այն, ինչ որ իր կոչումն է»,- խոսքը եզրափակել է Մայր Աթոռ Սուրբ Էջմիածնի դիվանապետը։

Հարցազրույցի մանրամասները՝ տեսանյութում։