Վրաստանում տեղեկացնում են՝ ռուսական կողմը հայկական բեռնատարների մուտքն արգելելու որոշում է կայացրել․ Գառնիկ Դանիելյան

Բեռնատարների վարորդները, ֆերմերները ահազանգում են, որ օրերով չեն կարողանում գյուղմթերքն արտահանել Ռուսաստանի Դաշնություն, ֆեյսբուքում գրել է ԱԺ «Հայաստան» խմբակցության անդամ Գառնիկ Դանիելյանը։

 «Վրաստանում տեղեկացնում են, որ հայկական բեռնատարների մուտքը արգելելու որոշում կայացրել է ռուսական կողմը։

Հայկական բեռնատարները արդեն օրեր շարունակ կանգ են առել Վրաստանում՝ սպասելով որևէ պարզաբանման։

 Այս ամենի արդյունքում, լրջագույն վնասներ կարող են կրել ջերմոցային տնտեսությունները։ Իսկ առաջիկա ամիսներին, երբ մեկնարկի ծիրանի և այլ մրգերի սեզոնը, կարող է ամբողջովին վտանգվել գյուղատնտեսության այս ճյուղը։

 Խնդրի կապակցությամբ հարցումներ եմ ուղղել Էկոնոմիկայի նախարարության ու ՊԵԿ-ին։

 Հայկական կողմը պետք է պարզաբանում պահանջի և կիրառի բոլոր անհրաժեշտ միջոցները՝ խնդրին հրատապ լուծում տալու համար», - գրել է պատգամավորը։