Ինչպես են Ստեփանակերտում դիմավորել 50 օր անց տուն վերադարձած փոքրիկներին

Ավելի քան 1,5 ամսվա բաժանումից հետո «Արցախի «Ասպարեզ» պարային ստուդիայի սաները հասել են Ստեփանակերտ: Արցախում մի խումբ ծնողներ ու հարազատներ  «Մենք ենք մեր սարերը» հուշակոթողի մոտ են դիմավորել Երեւանից ժամանող սաներին:

Գայանե Հակոբյանը Մարտունու շրջանի Բերդաշեն համայնքից է  հասել Ստեփանակերտ, որ րոպե առաջ տեսնի դստերը, Սիլվա Հովհաննիսյան էլ թոռանը խոստացել էր անձամբ գալ ու դիմավորել:

Ստուդիայի Արցախում մնացած սաները փուչիկներով եկել էին դիմավորելու իրենց ընկերներին:

Արդեն Ստեփանակերտ հասած պարուհիներից Մարիա Ղարիբյանը նշեց, որ Վրաստանում  կայացած միջազգային մրցույթում զբաղեցրել են 4-ր տեղը. «Արդեն հետ գալուց իմացանք, որ ճանապարհը փակվել է: 7 ժամ մնացինք դրսում՝ մտածելով, որ կբացվի, հետո հասկացանք, որ դեռ երկար է շարունակվելու, գնացինք հյուրանոց: «Ամեն ինչ, բոլոր զգացողություններս խառնվել են իրար՝ կարոտը, ուրախությունը»:

Ստուդիայի պարուսույց Լարի Ավանեսյանն էլ ասաց, որ մինչ օրս չեն կարողացել մրցույթում ունեցած հաղթանակը նշել, քանի որ Արցախում չէին: