28 06 2022

Նամակ փոխանցեցինք, որ հանձնի դեսպանին․ գերիների ծնողները դադարեցրին ակցիան․ Hraparak.am

Նամակ փոխանցեցինք, որ հանձնի դեսպանին․ գերիների ծնողները դադարեցրին ակցիան․ Hraparak.am

Hraparak.am-ը գրում է․

Ինչպես արդեն տեղեկացրել ենք, այսօր շիրակցի գերեվարված զինծառայողների հարազատները հավաքվել են Գյումրիում Ռուսաստանի հյուպատոսության առաջ։ Նրանք պահանջում են հյուպատոսից հանդիպում կազմակերպել Հայաստանում ՌԴ  դեսպանի հետ: Շիրակցի 62 գերեվարված զինծառայողներից 39-ը դեռևս գտնվում է գերության մեջ: Գերիների հարազատների այսօրվա բողոքի ակցիան պայմանավորված էր վարչապետ Նիկոլ Փաշինյանի երեկվա օնլայն ասուլիսում արած հայտարարության հետ:

«Ուզում եմ արձանագրել, որ Ադրբեջանի՝ գերիներին չվերադարձնելու քաղաքականությունը նպատակ ունի վարկաբեկել ԼՂ-ում և Լաչինի միջանցքում ռուս խաղաղապահների գործունեությունը: Այսօր հաստատված գերեվարված անձանց 90 և ավել տոկոսը գերեվարվել են ռուս խաղաղապահների տեղակայումից հետո և նրանց պատասխանատվության գոտում»,- ասել էր նա:

Շիրակի մարզի Այգաբաց համայնքից գերեվարված 23-ամյա պահեստազորային Ռոբերտ Գևորգյանի հայրը՝  Հովհաննես Գևորգյանը, hraparak.am-ին ասաց, որ այս պահին որոշեցին դադարեցնել Գյումրու հյուպատոսարանի շենքի առաջ իրենց նստացույցը : 

 «Հյուպատոսի միջոցով նամակ փոխանցեցինք, որ հանձնի դեսպանին: Սկզբում  նրա հետ հանդիպում պահանջեցինք, որ կազմակերպեն, բայց քանի որ տեղում չէր, նամակ փոխանցեցինք»,-ասաց գերու ծնողը :

Հարցին, թե ինչու հենց այսօր՝ վարչապետի երեկվա հայտարարությունից հետո, որոշեցին ոտքի կանգնել, ասաց․«Դե, ռուս խաղաղապահներն էին այնտեղ կանգնած, իրենց պատասխանատվության տակ էր, երբ գերի ընկան․․, մեզ հիմա ուղղակի պարզաբանում է պետք, հասկանանք՝ ինչու մեր երեխեքին չեն բերում․․․»։

 

 

 

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ