Պայքարը որևէ կերպ նահանջ չի ունենալու․ փողոցային պայքարն առաջնահերթ է․ Իշխան Սաղաթելյան

«Չկա նման բան, դադար վերցնելու որևէ տարբերակ մենք չենք քննարկում, որովհետև դրա ո՛չ առիթը կա,  ո՛չ էլ պատճառը, ընդհակառակը՝ առավոտից երեկո քննարկում ենք, կոնկրետ քայլեր, գործողություններ ձեռնարկում պայքարին նոր թափ տալու, ընդլայնելու»,- Yerevan.Today-ի հետ զրույցում անդրադառնալով մամուլի հրապարակումներից մեին,  իբրև թե առաջիկա օրերին ընդդիմությունը կհայտարարի անհնազանդության ակցիաների այս փուլի դադարեցման մասին, ասաց Իշխան Սաղաթելյանը։

«Պայքարը որևէ կերպ նահանջ չի ունենալու, որովհետև ասել ենք՝ այս պայքարի պարտությունը մեր ժողվորդի պարտությունն է։ Մենք օգտվելու ենք բոլոր գործիքակազմերից, բայց փողոցային պայքարը  առաջնահերթն է, և այս պահին ամենաարդյունավետը, որովհետև հանրային ճնշմամբ իշխանությանը հեռացնելու միակ ճանապարհը փողոցային պայքարն է։ Հետևաբար, որևէ կերպ այստեղից նահանջ չի լինելու»,- ընդգծեց Սաղաթելյանը՝ հավելելով, որ «Դիմադրություն» շարժման պայքարի արդյունքում ամբողջ աշխարհին ուղերձ է հղվել, որ Նիկոլ Փաշինյանը իրավունք  և մանդատ չունի ժողովրդի անունից և երկիրը նոր զիջումների տանելու։

Ինչ վերաբերում է մարդկանց հոգնելու, շարժման «մաշվելու» մասին խոսակցություններին, Սաղաթելյանը նկատեց․ «Մեկ ամսից ավել է փողոցային պայքար է ընթանում  ու 4-րդ օրվանից ասում են մարդիկ կհոգնեն, կհիասթափվեն, կմաշվի։ Բայց ՀՀ արժանապատիվ քաղաքացին ամեն օր հակառակն է ապացուցում» Մայիսի 28-ի հանրահավաքը դրա վառ ապացույցն է․ դրանից հետո վարչապետի աթոռին հայտնված անձը ունեցավ իր հերթական հիստերիկ ցնցումները՝ կոնկրետ հրահանգելով ոստիկանությանը, որ  բռնի ուժ կիրառեն քաղաքացիների նկատմամբ։

Մեկ ամիս անց ավելի մեծ թվով հնարահավաքներ են տեղի ունենում։ Հետևաբար, մարելու մասին խոսակցությունները  անիմաստ են։ Խնդիրը ավելի կազմակերպված, շարժմանը նոր թափ և լիցք տալով պայքարը առաջ տանելու մեջ է, մենք գնում ենք այդ ուղղությամբ»,- ասաց Սաղաթելյանը։

Նա նշեց, որ հենց սկզբից էլ ժամկետներ չեն նշել, սակայն քաջ գիտակցում են, որ ժամանակը սուղ է և ամեն ինչ պետք է անեն, որ իշխանություններն օր առաջ հեռանանան։

Անդրադառնալով խոսակցություններին, որ շարժումը պետք է ռեբրենդինգի ենթարկել՝ նոր ասելիք, նոր դեմքեր առաջ բերել, Սաղաթելյանը նկատեց․ «Ովքե՞ր են նոր դեմքերը, վաղն առավոտ բոլորին հրավիրում եմ հրապարակ։ Այս մասին մամուլում շատ է խոսվում, նոր առաջնորդ, նոր դեմքեր» Մենք ասել ենք, որ այս հարթակը  մեկ կուսկացության, մեկ անձի, մեկ ուժի հարթակ չէ։ Ովքեր պատրաստ են պայքարել, սա իրենց հարթակն է, և ես մեկ անգամ ևս բոլորին հրավիրում եմ։

Այս թեման շատ է շահարկվում, թե կան մարդիկ, որ կարող են հարթակում լինել, հարթակում չեն։ Եվս մեկ անգամ բոլորին հարվիրում եմ՝ եկեք, բարձրացեք, ձեր ասելիքը ասեք, միացեք ոչ թե մեզ, այլ՝ օրակարգին, ժողովրդի օրակարգին, որևէ սահմանափակում չունենք։ Բայց նրանք, ովքեր տարբեր պատճառներով խուսափում են մաս կազմել և դա ինչ-որ կերպ արդարացնում են, դա, բնականաբար, անընդունելի է։ Որովհետև մենք առաջին օրվանի շատ հստակ ձևակերպել ենք՝  սա կուսակցական պայքար չէ, համաժողվորդական պայքար է»։

Սաղաթելյանը ժխտում է մամուլում շրջանառվող լուրերը, թե ՀՀԿ-ի հետ կան անհմաձայնություններ․ «Առիթ չեմ տեսնում մամուլի ամեն նախադասություն մեկանբանելու, կարող եմ ասել, որ ՀՀԿ-ն ամբողջությամբ նվիրված է այս պայքարին և մենք որևէ տարաձայնություն, խնդիր չունենք»։