ՔՊ-ն մերժեց «Հայաստան» խմբակցության՝ Կենսաթոշակների մասին օրենքում փոփոխությունների նախագիծը

Ազգային ժողովում «Հայաստան» խմբակցության պատգամավոր Աղվան Վարդանյանը ներկայացնելով կենսաթոշակների մասին ՀՀ կենսաթոշակների մասին ՀՀ օրենքում լրացումներ կատարելու մասին նախագիծը նշեց. 

«Կենսաթոշակն անկանխիկ եղանակով ստացող կենսաթոշակառուն պարտավոր է տարկան առնվազն մեկ անգամ ներկայանալ բանկ, կամ ազգային օպերատորին և հայտարարություն ստորագրել ՀՀ-ում գտնվելու մասին: Այն չստորագրելու դեպքում կենսաթոշակ վճարելը դադարեցվում է, այսինքն ամեն տարի 480 հազար գումարած նպաստառուները մեկ անգամ պարտավոր են գնալ բանկ հաստատելու, որ իրենք Հայաստանում են. այս դրույթի կիրառումը ծանրաբեռնվածություն է առաջացնում մեր քաղաքացիների համար»,- ասաց պատգամավորը և ընդգծեց, որ հաշվի առնելով նշվածը առաջարկում են սահմանել, որ օրենքի 35-րդ հոդվածի 6-րդ մասով սահմանված հայտարարությունը՝ չներկայացնելու դեպքում կենսաթոշակ վճարելը չի դադարեցվում, եթե կենսաթոշակառուն գտնվում է Հայաստանի Հանրապետությունում: 

Աղվան Վարդանյանի ելույթին հաջորդեց իշխանական պատգամավոր Հերիքնազ Տիգրանյանը, ով իր գործընկերներին կոչ արեց դեմ քվեարկել նախագիծը լիագումար նիստերի օրակարգ մտցնելու հարցին:

Իշխանությունն ընդառաջ գնալով թիմակցի կոչին՝ 64 դեմ, 28 կողմ ձայնով որոշումը չընդունվեց: