Ես տեսնում եմ հնարավորություն բանակցությունների միջոցով վերադարձնելու ԼՂԻՄ տարածքները․ Ռոբերտ Քոչարյան

Ես տեսնում եմ հնարավորություն բանակցությունների միջոցով վերադարձնելու ԼՂԻՄ տարածքները, խոսքը մասնավորապես Շուշիի ու Հադրութի մասին է։ Աջակիցների հետ հանդիպմանը հայտարարել է ՀՀ երկրորդ նախագահ Ռոբերտ Քոչարյանը։

Երկրորդ նախագահի խոսքով, պատերազմի արդյունքների իրավականորեն ճանաչումը միջազգային հանրության կողմից դիտվում է որպես թույլ փաստարկ, «և ոչ լավ փաստարկ»։

«Դա նույնն է, որ մենք 92-94 թվականների պատերազմից հետո ասեինք՝ մենք մեր հարցերը լուծել ենք, չենք բանակցում։ Ըստ էության, դա ասվեց ու դրա պատճառով հրահրվեց պատերազմը։ Ասացինք, որ Ղարաբաղը Հայաստանն է ու վերջ, բացի այդ հայտարարվեցին մի շարք տնտեսական ծրագրեր հարավում, փակուղու մեջ մտցրեցինք բանակցային գործընթացը, և հակառակորդը հարցի լուծման համար այլ ճանապարհ, քան պատերազմը, չգտավ»,-մանրամասնել է Ռոբերտ Քոչարյանը։

Ռոբերտ Քոչարյանը պնդում է, որ  բավարար հիմքեր ունենք իրավական ու բանակցային ճանապարհով լուծել Շուշիի և Հադրութի հարցը։

«Մենք այստեղ ասելիք ու հիմքեր ունենք՝ հարցն առաջ մղելու համար։ Ընդհանրապես, պատերազմում պարտվելը դառը բան է և եթե ուզում ես նման կարգի հարցերի առջև չկանգնես, պետք է չպարտվես, պետք է անել ամեն ինչ նոր պատերազմի մեջ չմտնելու համար, սա է խնդիրը», - ասել է Ռոբերտ Քոչարյանը։

Մանրամասն՝տեսանյութում։