01 04 2021

Չէ՞, որ չեն կարող պատերազմում և՛ հաղթած, և՛ պարտված հրամանատարները երկուսն էլ հերոս լինել միևնույն վարչապետի համար. Սամվել Ֆարմանյան

Չէ՞, որ չեն կարող պատերազմում և՛ հաղթած, և՛ պարտված հրամանատարները երկուսն էլ հերոս լինել միևնույն վարչապետի համար. Սամվել Ֆարմանյան

Էդմոն Մարուքյանը հրապարակել է իր գրությունը Նիկոլ Փաշինյանին՝ առաջարկելով վերջինիս միջնորդությամբ դիմել ՀՀ նախագահին՝ Կոմանդոսին շնորհելու ՀՀ բարձրագույն՝ ՀՀ Ազգային հերոսի կոչում: Այն, որ Արկադի Տեր-Թադևոսյանի անունը ոսկե տառերով է գրված մեր պատմության մեջ ու այդպես էլ մնալու է հայ ժողովրդի հիշողության մեջ, ակնհայտ է՝ նման կոչում երբևէ նրան շնորհվի, թե ոչ. այդ կոչումը մեր ժողովուրդը Կոմանդոսին վաղուց տվել է: Այս մասին ֆեյսբուքյան իր էջում գրել է հասարակական-քաղաքական գործիչ Սամվել Ֆարմանյանը:

«Ինձ զարմացնում է լրիվ ուրիշ բան: Եթե Էդմոն Մարուքյանի ընկալումներում Կոմանդոսը հերոս է, որովհետև Շուշիի ազատագրման ռազմական գործողությունն է ղեկավարել, ապա ո՞վ կամ ի՞նչ է նա, ում ղեկավարությամբ հանձնվել է նույն Շուշին, ապա նաև որակվել իբրև դժգույն և դժբախտ քաղաք: Ինչպե՞ս կարելի է մարդասպանին առաջարկել գնահատել իր զոհի կյանքի արժեքը:

Կամ, եթե Նիկոլ Փաշինյանն արդեն ՀՀ Ազգային հերոսի կոչում է շնորհել ԱԻ նախարար Փիլոյանին՝ պատերազմում ձախողվելու ու տարածքներ զիջելու համար, ապա այդ ո՞ր տրամաբանությամբ է բարոյական, որ նույն անձը նույն բարձրագույն կոչումը շնորհի դրա լրիվ հակառակն արած զորահրամանատարին՝ Կոմանդոսին: Չէ՞, որ չեն կարող պատերազմում և՛ հաղթած և՛ պատերազմում պարտված հրամանատարները երկուսն էլ հերոս լինել նույն իշխանության համար:

Հ.Գ. Էդմոն, եթե Նիկոլին առաջարկ ունես, ապա բարեկամաբար ասա թող կիլոմետրերով հեռու մնա այն ամենից, ինչը դեռ տեսականորեն կարող է համախմբել հայ ժողովրդին՝ պատերազմի հիշողություն, իրական հերոսներ, սպորտ, ֆուտբոլ և այլն: Սատանան ի՞նչ գործ ունի լույսի հետ»,- գրել է Սամվել Ֆարմանյանը:

Նշենք, որ ավելի վաղ Էդմոն Մարուքյանը տեղեկացրել էր, որ առաջարկել է Նիկոլ Փաշինյանին՝ գեներալ-մայոր Արկադի Տեր-Թադևոսյանին շնորհել ՀՀ Ազգային հերոսի կոչում:

 

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ