Իշխանությունն ասում է՝ մեր կազմած ընտրական օրենսգրքին չե՞ք գա կողմ քվեարկի. Մարուքյան

«Մենք տեսանք, որ այդ մեթոդը՝ ընտրել անցումային վարչապետ մինչ օրս չի ստացվել, որովհետև վարչապետը հրաժարական չի տվել՝ որևէ հանգամանքով և ճգնաժամը խորանում է: Հիմա, որպեսզի ճգնաժամից դուրս գանք «Լուսավոր Հայաստանն» արեց զիջում և ասաց, որ եթե ԳՇ-ի խնդրից մի կողմ կքաշվեք, մենք պատրաստ ենք գնալ ձեր առաջարկած ճանապարհով, այսինքն կնքել հուշագիր, որ մարդ չենք առաջադրում, որից հետո իշխանությունն էլ չգնաց զիջման:

Դրանից հետո մյուս հայտարարությունն արեցինք, որ չնայած դուք անզիջում եք բոլոր ձեր առաջացրած պրոբլեմների համատեքստում, սակայն երկրում թիվ մեկ խնդիրը քաղաքական ճգնաժամը լուծելու համար շարունակում է լինել արտահերթ ընտրությունների օրակարգը, և «Լուսավոր Հայաստանը», եթե մինչև հունիսի մեկը կազմակերպվեն արտահերթ ընտրություններ, պաշտոնապես հայտարարեց, որ չի առաջադրի վարչապետի թեկնածու վարչապետի հրաժարականի պարագայում և չի խոչընդոտի, միայն թե խորհրդարանը լուծարվի և գնանք ընտրությունների:

Հիմա արդեն որևէ խոսակցության հետ կապված մենք որևէ պայմանավորվածություն չենք կարող ունենալ»,- լրագրողների հետ ճեպազրույցում ասաց ԼՀԿ առաջնորդ Էդմոն Մարուքյանը: