Կուսակցությունների հայտարարությունը կառավարությանը մեկնած բարի կամքի ժեստ է․ Ավետիք Չալաբյան․ Panorama.am

Panorama.am-ը գրում է․

«Հայաստանյան 13 կուսակցությունների՝ ռազմաքաղաքական հարցերի օպերատիվ կառավարման շտաբ, պետական հատուկ մարմին ստեղծելու առաջարկին կառավարությունը դեռ չի արձագանքել:

Panorama.am-ի հետ զրույցում հայտարարությանը միացած «Ազգային օրակարգ» կուսակցության համահիմնադիր Ավետիք Չալաբյանն ասաց, որ իրենց այդ քայլը կառավարությանը մեկնած բարի կամքի ժեստ է:

«13 կուսակցությունների առաջարկը բաց է, մարդիկ, ըստ էության, ասում ենք՝ մենք ձեզ օգնենք, կառավարություն: Մեր նպատակը դա է: Լավ կլինի կառավարության կողմից արձագանք լինի: Դա կառավարությանը մեկնած բարի կամքի ժեստ է, թող արձագանքեն: Եթե չեն արձագանքում, ըստ էության, ասում են հետևյալը՝ մենք լիակատար պատերազմական այս ամբողջ իրավիճակի համար պատասխանատվությունը մեր վրա ենք վերցնում, մեզ ոչ մեկի օգնությունը պետք չէ»,- նշեց քաղաքական գործիչը:

Նա ընդգծեց՝ եթե չարձագանքեն էլ, իրենք որպես անհատներ, ֆիզիկական անձինք շարունակելու են իրենց աջակցությունը, որովհետև այս պատերազմը ողջ ազգի պատերազմն է, այստեղ ոչ կուսակցությունն կա, ոչ իմ ու քո, ոչ սև-սպիտակ:

«Մինևնույնն է՝ դա անելու ենք: Պարզապես, եթե կառավարությունը իսկապես հասկանա, որ սա ոչ թե միտում, դիտավորություն ունեցող քայլ է, այլ իսկապես օգնության առաջարկ է ու ընդառաջ գնա, մեր գործունեության արդյունավետությունն էապես կբարելավենք»,- ասաց Ա.Չալաբյանը:

Նա նշեց, որ կոնկրետ իրենց կուսակցությունն առանց այդ հայտարարության էլ տարբեր ձևերով լծված են երկրի պաշտպանության գործին, բայց եթե որոշակի նորմալ լծակներ լինեն, իրենց գործունեության արդյունավետությունը հինգ անգամ կբարձրանա: 

«Ինքս զբաղված եմ պատերազմի հետ կապված օգտակար գործերով: Համոզված եմ, եթե ունենայի պետական լծակներ, 5-10 անգամ ավելի շատ բան կարող էի անել: Հիմա անում եմ որպես մասնավոր, ֆիզիկական անձ: Պետական ռեսուրսներ, պետական լծակներ, լիազորություններ ունենալով՝ շատ ավելի բան կարող եմ անել, գիտեմ նույնիսկ ինչպես, ինչն է, որ կտա պետական լծակները»:

«Ցավալի կլինի, որ կառավարությունը չընդունի այս առաջարկը: Իսկապես գտնվում ենք հայրենական պատերազմի մեջ:  Այս մասշտաբի պատերազմ, այս կարգի ինտենսիվությամբ, այս կարգի կորուստներով, ռազմական գործողությունների այս մասշտաբով, մեր սերունդի պատմության մեջ չի եղել: Արցախյան առաջին պատերազմը 1000 օր է տևել:  20 օրում այս պատերազմն իր մասշտաբներով, ռազմական գործողությունների արդյունքներով հավասարվել է այն 1000 օրվան: Ո՞նց կարելի է  հիմա շարունակել գնալ նեղ կուսակցական բանով… որ մենք ենք, մենք էլ կանք»,- նշեց նա:

Ինչ վերաբերում է կուսակցությունների հայտարարությունից հետո բարձրացված աղմուկին, Վ. Չալաբյանն ասաց, որ տարբեր մարգինալներ են բարձրացրել այն:

«Այդ աղմուկը մարգինալներն են բարձրացրել, որոնք իրենք այդ պրոցեսին չեն մասնակցում: Ես դրա վրա չեմ զարմանում:

Կարծում եմ՝ իրենք հասկանում ենք, որ դա հասարակության մեջ բերելու է  իրական կոնսոլիդացիայի, բերելու է նրան, որ ստեղծվի ամուր համազգային բռունցք: Կարող են ուղղակի այդ պրոցեսից դուրս մնալ, որովհետև հիմա դրան հակադրվելով և փորձելով ինչ-որ դավադրապաշտություն բան անել և այլն, որ սա սողացող հեղաշրջում է … Հեղաշրջում լիներ՝ հենա հեղաշրջում կլիներ, էլի: Հեղաշրջումը՝ բացահայտ կուսակցությունները հայտարարությո՞ւն են անում:

Դա հանրային պրոցես է: Կուսակցությունները հավաքվել են, երկար քննարկումներից հետո հայտարարություն են ստորագրել, որը հանրայանցվել է, փաստացի կառավարությանն առաջարկ է: Ու այդ ամեն ինչի նպատակն այն է, որ օգնենք կառավարությանը»:

Հարցին՝ «Իմ քայլը» խմբակցության պատգամավոր Վահագն Թևոսյանն ասում է՝ 13 կուսակցությունների առաջարկը հակասահմանադրական է, ինչպե՞ս կարձագանքեք այդ հայտարարությանը, «Ազգային օրակարգ» կուսակցության համահիմնադիրն ասաց.

«Բացարձակ հակասահմանադրական չէ, որովհետև Ռազմական դրության մասին օրենքը դա նախատեսում է: Արտակարգ դրության ռեժիմում գործում է պարտետատունը, նույն տրամաբանությամբ պետք է հիմա այդ կարգի մարմին գործի: Զարմանում եմ, որ մինչև հիմա չի գործում: Ամբողջ երկրի տարածքը գտնվում է ռազմական դրության մեջ, ամբողջ երկիրը գտնվում է  մոբիլիզացիոն ռեյլսերի վրա: Մարդիկ կռվում են, արտադրում են, սպառազինություն են արտադրում, մատակարարումներ են անում, միջոցներ են հավաքում: Երկրում Արցախից եկած գաղթականներ կան: Բացարձակ սահմանադրական օրգան է, մենք էլ կառավարությանն առաջարկել ենք ընդամենն այդ օրգանը ստեղծել: Ի՞նչ հակասահմանադրական բան կա:

Սահմանադրական կարգը կարելի է տապալել միայն գործողությամբ, հայտարարությամբ հնարավոր չէ սահմանադրական կարգ տապալել»»: