Զարգացումներն ապացուցեցին՝ ես ճիշտ էի. խորհրդարանական համակարգը հարմար չէ ՀՀ-ին. Ռոբերտ Քոչարյան

ԼՂՀ առաջին և ՀՀ երկրորդ նախագահ Ռոբերտ Քոչարյանը բացառիկ հարցազրույց է տվել ռուսական РБК հեռուստաալիքին: Լրագրողը հարցրել և ստացել է Հայաստանի երկրորդ նախագահի տեսակետները քաղաքականություն վերադարձի, «թավշյա հեղափոխության» պատճառների, Բելառուսում իրավիճակի, Ադրբեջանի հետ հակամարտության, Արցախի խնդրի կարգավորման, Սերժ Սարգսյանի, Հայաստանի տնտեսության ու առաջիկա ծրագրերի մասին:

Ստորև ներկայացնում ենք քաղաքականությունից հեռանալու, Սերժ Սարգսյանի պաշտոնավարման և 2015 թվականի Սահմանադրական հանրաքվեին վերաբերող հատվածը:

-Դեռ կխոսենք ընդդիմության ինտելեկտուալ մակարդակի մասին: Այժմ խոսենք հետևյալից: Ասացիք, որ 2008-ին հեռացել եք ընդմիշտ: Արդյո՞ք դա կապված էր այն բանի հետ, որ Ձեզանից հետո թողնում էիք «Ձեր մարդուն»՝ Սերժ Սարգսյանին։

- Որոշ չափով նաև այդ պատճառով: Կարծում եմ, որ իրավահաջորդի հարցը որոշակի չափով անհանգստացնում է ցանկացած ղեկավարի, դա բնական ցանկություն է՝ տեսնել իրավահաջորդի մեջ մի անձի, ով կշարունակի որոշակի քաղաքականություն: Հարցն անգամ անձի մեջ չէ,  նրան վստահելու կամ չվստահելու մեջ չէ, այլ այն վստահության մեջ, որ  կառուցված քաղաքական ուղեգիծը չի քանդվի: Յուրաքանչյուր ծառ տնկած մարդ ջրում է այն,  ծառն աճում է, կամ մարդը դաստիարակում է երեխաներին… Երկար տարիների ղեկավարումից հետո նման զգացողություն է առաջանում, պատասխանատվություն ես զգում այդ ամենի համար և ցանկանում, որ  այդ ամենը շարունակություն ունենա: Այստեղ ավելի խորը խնդիր է, քանի ուղղակի իշխանության փոխանցում հավատարիմ կամ ոչ հավատարիմ անձին:

-Իսկ ապագայում չեղա՞վ արդյոք որոշակի հիասթափություն: Նկատի ունեմ 2018 թվականի իրադարձությունները:

-Բնական է, որոշ հիասթափություն եղավ:

-Չէ՞ որ Դուք չաջակցեցիք 2015 թվականի բարեփոխումներին:

-Սահմանադրական բարեփոխումների մասի՞ն է խոսքը: Այո, չաջակցեցի, քանի որ կարծում եմ, որ կառավարման խորհրդարանական համակարգը հարմար չէ Հայաստանի համար: Ինչպես ցույց տվեցին հետագա իրադարձությունները, ես ճիշտ էի: Ի դեպ, շատերը չաջակցեցին:  Ներկուսակցական դեմոկրատիայի բացակայության պայմաններում խորհրդարանական համակարգը վերածվում է կուսակցական «բոսի» իշխանության, նրա միանձնյա իշխանության:  Գիտեք՝ Հայաստանի որևէ նախագահ չի ունեցել այն իշխանությունը, որն այսօր ունի երկրի վարչապետը:

- Մարդկանց մոտ հավանաբար տպավորություն է ստեղծվում, որ փոխվում են մարդիկ, սակայն կա մի բան, որը կայուն է և մնում է երկարաժամկետ:

- Անկասկած: Դա միջուկն է, որի շուրջ կառուցվում է պետականությունը: Բացի դա, ի դեպ, կայացած արևմտյան երկրներում աշխատում են ավանդույթները: Այսինքն, պարտադիր չէ, որ ամեն ինչ արտացոլված լինի Սահմանադրության մեջ, մշակվում է որոշակի ավանդույթ, որը տարիներով, տասնամյակներով պահպանվում է: Եթե դու 10 տարին մեկ փոխոխում ես Սահմանադրությունը, ընդ որում, արմատական կերպով, ապա հնարավոր չի լինում կառուցել այդ ավանդույթները:

-Դուք այն ժամանակ Սարգսյանին ասե՞լ եք, թե ինչու է նա անում դա, եթե գիտի, որ հանրությունը դեմ է լինելու: Դուք հասկանում էի՞ք ինչի՞ կարող է դա հանգեցնել:

- Այո, հասկանում էի: Այն ժամանակ մենք քիչ էինք շփվում, սակայն ես հրապարակայնորեն արտահայտել եմ իմ տեսակետը, մասնավոր զրույցներ այդ մասին չեն եղել:

Ամբողջական հարցազրույցը՝ այստեղ։