ԼՂ հարցով մեր դիրքորոշման մեջ ոչ մի փոփոխություն չի եղել․ Կանադայի ԱԳՆ

Կանադայի ԱԳ նախարար Ֆրանսուա Ֆիլիպ Շամպանը Կանադայի Հայկական ազգային հանձնաժողովին (ANCC) հղած նամակում պարզաբանում է ներկայացրել երկրի դիրքորոշման վերաբերյալ ԼՂ հակամարտության հարցում։ Այս մասին հայտնում է ANCC-ը։

Նախարարը հայտարարել է, որ Կանադան լիակատար աջակցում է ԵԱՀԿ Մինսկի խմբի գործընթացը, հակամարտության խաղաղ կարգավորումը եւ ինքնորոշման սկզբունքը։

«ԼՂ հարցով մեր վաղեմի դիրքորոշման մեջ ոչ մի փոփոխություն տեղի չի ունեցել։ Կանադայի դիրքորոշումը նախկինի պես հիմնված է ԵԱՀԿ Մինսկի խմբի վճռական և հետեւողական գործունեության վրա, որն ուղղված է բանակցությունների հիման վրա կարգավորմանը հասնելուն, եւ մեր դիրքորոշումը չի կանխորոշում այդ գործընթացի ելքը։ Կանադան համաձայն է Մինսկի խմբի հետ, որ հակամարտությունը չունի ռազմական լուծում եւ ցանկացած բանաձեւ պետք է նկատի ունենա Հելսինկյան եզրափակիչ դրույթը»,-նշել է Կանադայի ԱԳՆ-ն։

Ապրիլի 3-ին ANCC-ը նամակ էր հղել Կանադայի ԱԳՆ ղեկավարին և մտահոգություն հայտնել Անկարայում Կանադայի դեսպանության թվիթերյան գրառման հարցով։ Իր թվիթում Կանադայի դեսպանությունը աջակցություն էր հայտնել «Ադրբեջանի տարածքային ամբողջականությանը» եւ չէր ճանաչել Արցախում անցկացված ազատ եւ արդար ընտրությունները։