Իշխանության հույսը` տխրահռչակ Գագիկ Մելքոնյանը. Top-news.am

Top-news.am-ը գրում է․ «Երեկ Հանրային հեռուստաալիքի հյուրը գեներալ-լեյտենանտ Գագիկ Մելքոնյանն էր, նա, ով 2008-ի մարտիմեկյան ողբերգության օրը զբաղեցնում էր ՀՀ պաշտպանության փոխնախարարի պաշտոնը, եւ որի անունն էին վանկարկում ցուցարարները՝ Լեւոն Տեր-Պետրոսյանի գլխավորությամբ փետրվարյան հանրահավաքների ժամանակ:

Նրանց համար, ովքեր չեն հիշում ասենք, որ վանկարկում էին այն պատճառով, որ պաշտպանության փոխնախարարը պատրաստվում էր բանակը ներքաշել քաղաքական պայքարի մեջ:

Հիմա այս մարդը Հանրայինի հյուրն է եւ ասում է իշխանահաճո տեքստեր: Իհարկե, հավանաբար գրագիտության մակարդակը թույլ չտվեց նախապես մշակված տեքստը վարժ արտասանել: Մնում է արձանագրել, որ գործող իշխանության հույսը հենց նմանատիպ մարդիկ են, որոնք որտեղ եւ երբ հայտնվել են տեղ են գտել ձախողումներ, խառնակչություններ եւ խժդժություններ:

Եթե ուզում եք հասկանալ, թե ով է Գագիկ Մելքոնյանը, որն ունի գեներալ-լեյտենանտի կոչում, ապա համառոտ ծանոթացեք նրա կարողությանը: Ծանոթանալուց հետո կհասկանաք, թե ինչո՞ւ է մեր բանակը նյութատեխնիկական խնդիրներ ունեցել եւ դեռ ունի: Եթե 2000-2008 թվականներին թիկունքի գծով ՀՀ պաշտպանության փոխնախարարը, զինված ուժերի թիկունքի պետը եղել է այսքան մեծ կարողության տեր դարձած մի մարդ, ապա կհասկանաք բազմաթիվ խնդիրների պատճառը:

Բայց հիմնական մեղավորը նա չէ, այլ նրանք ովքեր նրան գեներալ-լեյտենանտի կոչում են շնորհել, նշանակել պաշտպանության փոխնախարար թիկունքի գծով տեղակալ, վստահել զինվորների եւ բանկի նյութական մատակարարումը,հանդուրժել նրան, իսկ 2008թ. փետրվարյան դեպքերից եւ մարտի մեկից հետո բավարարվել ընդամենը պաշտոնանկ անելով:

Դե, բնական է, որ այսքանից հետո Գագիկ Մելքոնյանը հեռեւստաէկրանից արդեն դատավորի կեցվածքով հայտարարություններ կանի կամ կփորձի անել: Ինչ վերաբերում է Հանրայինին, ապա հետեւելով այս զարգացումներին, ապա կառավարությունից այնտեղ գործուղելու են արդեն Չալոյին:

Գեղամ Նազարյան