Նախկինում իրեն լավ դրսևորած Մնացականյանից գրեթե բան չի մնացել. Սամվել Ֆարմանյան

Բազմակողմ դիվանագիտության հարթակներում նախկինում իրեն լավ դրսևորած Մնացականյանից գրեթե բան չի մնացել. Այս մասին ֆեյսբուքյան իր էջում գրառում է կատարել քաղաքական, հասարակական գործիչ Սամվել Ֆարմանյանը։ Գրառումը ներկայացնում ենք ստորև․ «BBC-ին տված հարցազրույցում նա հախուռն է, չգիտի ինչ ասի, որ ճիշտ լինի դրսում ու սխալ չընկալվի ներսում, անհամոզիչ է ու խճճված: Արդյունքում` անընդունելի սայթաքում մեր հիմնարար հարցերի շուրջ: Չեմ խոսում այն մասին, թե ինչպիսի արտգործնախարար է Մնացականյանը, որպես քաղաքական պաշտոնյա: Դա թող անեն «ատելության կուսակցության» առաջնորդները: Բայց, հանուն արդարության, մի՞թե հեշտ է լինել Նիկոլ Փաշինյանի կառավարության արտաքին գործերի նախարարը: Իմ կարծիքով դա աշխարհում հնարավոր ամենադժվար բանն է. անգամ, եթե դու Թալեյրանն ես, Մետերնիխը կամ Գորչակովը: Այլ հարց է, թե ինչպե՞ս ու հանուն ինչի՞ իրեն հարգող դիվանագետը կարող էր ստանձնել այդ պատասխանատվությունը` շատ լավ իմանալով, որ Նիկոլ Փաշինյանն արտաքին հարցերում կատարելապես բոբիկ է, շփոթված, հախուռն, կամակոր ու ամենավատը` ծույլիկ, որն անգամ չի ուզում սովորել»: