Հենց դու քո ցեղով գնա օրենքին ենթարկվի․ ԲՀԿ նախագահը՝ լրագրողին

Հունիսի 19-ին ԱԺ-ում լրագրողների հետ զրույցում ԲՀԿ խմբակցության ղեկավար Գագիկ Ծառուկյանը, կրկին անդրադարձավ ՀՔԾ ծանուցածիրը ստանալուն, այն պատռելուն և հարցաքննության չներկայանալուն, նշեց, որ այլևս չի ցանկանում խոսել այդ թեմայով։

«Ինչ որ պետք ա, պատասխանած ա։ Այդ հարցի պատասխանը փակ է»,- նշեց Ծառուկյանը՝ բարկանալով հարցից, թե չունի՞ արդյոք մտավախություն, որ կարող են իրեն բերման ենթարկել։«Դատարկ-դատարկ խոսում ես, մտածի ինչ ես ասում: Մամլո խոսնակն իրավունք չունի քննիչի տեղը խոսելու, ինչ պետք է մենք պատասխանել ենք»։

Դիտարկմանը, թե օրենքին ենթարկվելը դատարկ խոսակցությո՞ւն է, Ծառուկյանը պատասխանեց. «Հենց դու քո ցեղով գնա օրենքին ենթարկվի»։

Պատգամավորը կրկին շեշտեց, որ ինքը որևէ կապ չունի Աբովյանի ընտրություններին ՔՊ-ականի մեքենան ու բնակարանի մուտքն այրելու հետ։ 

«Ծառուկյանը կետ առ կետ ամեն ինչ կատարում է: Դուք ավելի լավ է գնացեք գործը բացահայտեք, Ծառուկյանը դրա հետ ոչ մի կապ չունի:  Սաղ երկրի խնդիրը մի կաթիլ մեղրն է եղել: Ծառուկյանը դրա հետ կապ չունի, Ծառուկյանն իր կարծիքն է ասել: Ի՞նչ եք ազգի բոլոլա սարքել, մի կաթիլ մեղր սարքել: Ծառուկյանն ասում է՝ հարգում եմ օրենքը, բոլորը պարտավոր են օրենքի առաջ։ Եթե դրա կարիքը լիներ, որ Ծառուկյանի անհրաժեշտությունը լիներ, մի հազար հոգի ուղարկել էին, Ծառուկյանին տարել էին: Ինքնստինքյան շոու է սարքած, Ծառուկյանն ի՞նչ կապ ունի: Ես այսօր էլ եմ ասում, որ սարքած է, դա իմ կարծիքն է: Եթե դա չբացահայտվեց, սարքած գործ է: Ուզեցել են ստվեր գցեն ընտրությունների վրա: Ոնց կարար ես պետք լինեի ու չգնայի»:

Հիշեցնենք, որ Աբովյանի քաղաքապետի ընտրությունների նախօրեին հրկիզել էին «Քաղաքացիական պայմանագրի» քաղաքապետի թեկնածուի նախընտրական շտաբի ղեկավարի մեքենան և տան դուռը։ Ծառուկյանը նշել էր, որ դա շինծու գործ է, ինչից հետո ՀՔԾ-ն ծանուցագիր էր ուղարկել, որը ԲՀԿ ղեկավարը պատռել էր և չէր ներկայացել հարցաքննության։