Գաղտնալսման դեպքը չենք մարսել, դրա ձայնը դեռ կլսեք եվրադատարաններից. Էդմոն Մարուքյան

Ազգային ժողովի «Լուսավոր Հայաստան» խմբակցության ղեկավար Էդմոն Մարուքյանը խորհրդարանում ելույթ ունենալով՝ քննադատեց իշխանություններին երկրում մարդու իրավունքների ոտնահարման դեպքերի համար:

«Ուզում եմ ելույթս անվանել «Մարդու իրավունքները՝ հետհեղափոխական Հայաստանում». երկրում մի իրավիճակ է, որ բոլորը հպարտ են ու ուրախ, որ երկրում հեղափոխություն է եղել, այդ թվում՝ ես, բայց մարդու իրավունքների հարցում խնդիրներ ունենք, և ոնց որ թե, խոսողներ չկան, և այն մարմիններն ու ինստիտուտները, որոնք կոչված են, որ խոսեն, վախեցած են ֆեյսբուքյան կամ այլ ձևաչափերով իրենց վրա ուղղված հարձակումներից: Ուզում եմ հստակ ասել՝ չենք լռել, չենք էլ լռելու, բոլորս պետք է իմանանք, որ Հայաստանում մարդու իրավունքները այնքան էլ լավ չէ»,- ասաց Էդմոն Մարուքյանը:

Ընդդիմադիր պատգամավորը «շնորհավորեց» իշխանություններին ՄԻԵԴ-ում կոմունիկացված առաջին գործի կապակցությամբ.

«ՄԻԵԴ-ում ձեր դեմ գործ կա՝ փնթի արված նախաքննության մասով. տպավորություն կա, որ գաղտնալսման դեպքն անցավ գնաց: Ուրեմն իմացեք՝ չի մարսվել, մեր պետությունը չի մարսել, դրա ձայնը դեռ կլսեք եվրոպական դատարաններից»,- ասաց նա:

Մարուքյանը հիշեցրեց, որ ՀՔԾ պետի և ԱԱԾ տնօրենի գաղտնալսման դեպքի առթիվ քրեական գործ է հարուցված, սակայն կարծես թե «ձեն-ձուն չկա, և որևէ մեկի մոտ հարցեր չեն առաջացել այս ընթացքում»:

«Հասել ենք նրանք, որ դատավորները խուսափեն քրեական գործեր քննելուց, գործադիր իշխանությունը պետք է հստակ ձևակերպում տա, որ դատարանները պետք է լինեն անկախ, փաստաբանները՝ պաշտպանված, դրանք կոկրետ գործողությունների տեսքով պետք է լինեն: Էդ որ շատ ուրախացել ենք, որ նախկին իշխանությունների ներկայացուցիչների դեմ գործեր կան հարուցված, կարո՞ղ է էնքան անենք, փաստաբանները հրաժարվեն պաշտպանել, ու մարդիկ գործերը չսկած կրեն եվրոպական դատարաններում»,-մանրամասնեց Մարուքյանը:

Այնուհետև լրագրողների հետ զրույցում Էդմոն Մարուքյանն անդրադարձավ գաղտնալսման գործով Եվրադատարանից ակնկալիքին․ «Ամբողջ գործերը, որ քննվում են, փաստաբանները դիսկեր են ուղարկում Եվրոպական դատարան։ Պետք է սպասել վատ բաներ՝ Հայաստանի պարտություն եվրոպական դատարանում»։ Դրանից, ըստ Մարուքյանի, կբխի քրեական գործերի, վճիռների վերանայում։ «Այս ամեն ինչի պատճառով, ու այն պատճառով, որ բաց-հրապարակային քննություն չկա, թե ով ում զանգեց ու ինչի համար, վաղը-մյուս օրը մեր պետությունն է պատասխան տալու»,- հավելեց Էդմոն մարուքյանը՝ անհրաժեշտ համարելով, որ հարցերը բարձրաձայնվեն և թերությունները շտկվեն։