Նախարարությունների թվի կրճատումն ամենևին էլ փող խնայելը չէ․ Նիկոլ Փաշինյան

Կառավարության 2019 թվականի առաջին նիստին ՀՀ վարչապետի պաշտոնակատար Նիկոլ Փաշինյանը, անդրադառնալով Կառավարության հետագա կազմին և կառուցվածքին, նշեց․ «ԱԺ ընտրությունների նախընտրական քարոզարշավին խոստում ենք տվել, որ կազմը պետք  փոխվի, և նախարարությունների թիվը կրճատվի: Այս պրոցեսի իմաստը և նպատակը ամենևին էլ փող խնայելը չէ, նպատակն է բարձրացնել կառավարության և պետական կառավարման մարմինների արդյունավետությունը»

Նիկոլ Փաշինյանը հավելեց, որ իսկապես շատ լուրջ աշխատանք է սպասվում, և գործադիրում մի քանի քննարկումներ արդեն ունեցել են և դեռ էլի կունենան: 

«Մենք համոզված ենք, որ պետք է շարժվել այս ճանապարհով, և ըստ էության ՀՀ քաղաքացիներից ստացել ենք այդ մանդատը: Մենք կլսենք բոլոր տեսակետները, կկայացնենք առավել բալանսավորված որոշում»,-նշեց նա:

Անդրադառնալով Սփյուռքի նախարարության փակման թեմային՝ վարչապետի պաշտոնակատարը նշեց, որ թյուր կարծիք կա, թե ուզում են «խաչ քաշել» Սփյուռքի նախարարության վրա, բայց ընդհակառակը՝ խնդիրը սփյուռքի հետ կառավարության հարաբերությունները առավել արդյունավետ դարձնելն է: «Այս առումով մենք որոշակի մոդել և առաջարկ ունենք, որը ենթադրում է, որ սփյուռքի հետ հարաբերությունների մակարդակը ոչ թե կնվազեցվի, այլ կբարձրացվի, և այդ մոդելի վերաբերյալ քննարկումներ կունենանք սփյուռքի ներկայացուցիչների հետ և կհասնենք կոնսենսուսի»,-ասաց նա: