Բաքուն 2019թ. իր գլխավոր խնդիրն է համարել «տարածքների ազատագրումը»

ԼՂ հակամարտության կարգավորման ուղիների որոնումը 2019-ին կշարունակի լինել Ադրբեջանի գլխավոր խնդիրը: Այդ մասին հայտարարել է Ադրբեջանի ԱԳՆ ղեկավար Էլմար Մամեդյարովը, գրում է Trend-ը:

«Հիմնական նպատակն է զգալի արդյունքների հասնելը: Դա ոչ միայն իմ երազանքն է, ես կարծում եմ, դա յուրաքանչյուր ադրբեջանցու երազանքն է: Կարծում եմ, որ իմ հայ գործընկերոջ հետ Միլանում կայացած վերջին հանդիպման ժամանակ մենք երկար տարիների ընթացքում առաջին անգամ ինչ-որ փոխըմբռնման հասանք»,- ասել է նա:

Մամեդյարովը նշել է, որ հաջորդ ամիս կկայանա իր հանդիպումը ՀՀ ԱԳՆ ղեկավարի հետ: «Մենք կքննարկենք հակամարտության լուծման ուղիները: Ադրբեջանը հանդես է գալիս հակամարտության խաղաղ կարգավորման օգտին»,- ասել է նա:

«Մեր դիվանագիտության կարևորագույն խնդիրներից է մնում Ադրբեջանի դեմ Հայաստանի ագրեսիային վերջ դնելը, օկուպացված տարածքների ազատագրումն ու իրենց բնակավայրեր հարկադրաբար տեղահանվածների վերադարձը»,- ասվում է Ադրբեջանի արտաքին քաղաքական գերատեսչության հայտարարության մեջ: