Մակրոնի ելույթից հետո ֆրանսիացիները կողմ են ցույցերի դադարեցմանը

Ֆրանսիացիների մեծ մասը կարծում է, որ նախագահ Էմանուել Մակրոնի առաջարկից հետո բողոքի ցույցերը պետք է դադարեցվեն:  Այդ մասին են վկայում OpinionWay ընկերության իրականացրած սոցհարցման արդյունքները, գրում է РИА Новости-ն: Հարցմանը մասնակցածների կեսից ավելին՝ 54%-ը, կարծում է, որ այժմ «դեղին անթև բաճկոնների» բողոքի ցույցերը պետք է դադարեցվեն:

Դեկտեմբերի 10-ին Մակրոնը հանդես էր եկել ազգին հղված ուղերձով: Նա հայտարարել էր երկրում արտակարգ տնտեսական և սոցիալական դրության ռեժիմ մտցնելու մասին, խոստացել բարձրացնել նվազագույն աշխատավարձը, ցածր կենսաթոշակների դեպքում վերացնել պահումները, արտաժամյա աշխատանքի և տարեկան պարգևավճարների դեպքում` հարկերը:

Ֆրանսիայի նախագահը հատուկ միջոցառումների փաթեթ է ներկայացրել 2000 եվրոյից պակաս թոշակ ստացողներին աջակցելու համար, ինչպես նաև հորդորել է գործատուներին աշխատողներին տարեկան պարգևավճարային աշխատավարձեր վճարել: Նախնական տվյալներով՝ Մակրոնի առաջարկած միջոցառումների իրականացումը  8-9 մլրդ եվրո կարժենա: