Երևանի ավագանին հավանություն է տվել որոշման մի շարք նախագծերի

Նոյեմբերի 27-ին գումարված արտահերթ նիստում քաղաքապետ Հայկ Մարությանը մինչ օրակարգին անցնելը հայտարարեց, որ «Իմ քայլը» կուսակցությունների դաշինքի ցուցակով Երևան քաղաքի ավագանու անդամ ընտրված Արամ Մանուկյանը դիմում է ներկայացրել ավագանու անդամի պաշտոնից հրաժարվելու մասին, ում մանդատը տրվել է «Իմ քայլը» դաշինքի ցուցակի անդամ Նուարդ Վարդանյանին:

Երևանի ավագանին հավանություն է տվել Բաղրամյան պողոտայի 1-ին փակուղին Ռաֆայել Լեմկինի փողոց կոչելու որոշման նախագծին։  Ավագանին արտահերթ նիստում հավանություն է տվել նաև Երևանի 2018 թվականի բյուջեի կատարման տարեկան հաշվետվության վերաբերյալ անկախ աուդիտ անցկացնելու նպատակով աուդիտորական ծառայություն ներգրավելու նախագծին: Աուդիտորական ծառայությունների ձեռքբերումն, ի դեպ, կիրականացվի գնումների գործընթացով՝ բաց մրցույթի կիրառմամբ:  Օրակարգի մեկ այլ կետով հաստատվել է քաղաքապետարանի ընդլայնված հաստիքացուցակը, ինչը նպատակ ունի բարձրացնել Երևանի քաղաքապետարանի ներքին աուդիտի բաժնի աշխատանքների արդյունավետությունը:  Արտահերթ նիստում հավանություն է տրվել նաև Երևանի ավագանու անդամներին դրամական փոխհատուցում տրամադրելու մասին որոշման նախագծին: Երևանի բյուջեով ավագանու անդամների համար նախատեսված են ամսական գումարներ՝ նվազագույն աշխատավարձի չափով (55 000 դրամ):