ԱԺ պետաիրավական հանձնաժողովը հավանություն տվեց համաներման նախագծին

ՀՀ ԱԺ պետական-իրավական և մարդու իրավունքների պաշտպանության հարցերի մշտական հանձնաժողովն արտահերթ նիստում փակ ընթացակարգով քննարկել է և հավանության է արժանացրել «Էրեբունի-Երևանի հիմնադրման 2800-ամյակի և Հայաստանի առաջին Հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» օրենքի նախագիծը:

Քննարկումից հետո Գևորգ Կոստանյանը պարզաբանեց, որ կառավարությունը համաձայնություն է տվել բոլոր խմբակցությունների առաջարկներին։

Գևորգ Կոստանյանը նաև չմեկնաբանեց՝ արդյոք նախագիծն աննախադեպ ընդգրկուն է, ինչպես հայտարարում է Կառավարությունը։ «Շրջանակը լայն կամ նեղ լինելու տեսակետից մենք կարող ենք խոսել բովանդակային քննարկումները ավարտելու արդյունքում: Հիմա ես չեմ ուզում դա մեկնաբանել: Առաջին ընթերցման արդյունքում գնահատելու հնարավորություն կունենանք»,- ասաց նա։

Կոստանյանը հավելեց՝ հնարավոր է, որ քննարկումների արդյունքում բովանդակային փոփոխություններ տեղի ունենան։