Նիկոլ Փաշինյանի հանրահավաքը՝ Հանրապետության հրապարակում. Լուսանկարներ. Թարմացվում է

Երևանի Հանրապետության հրապարակում բազմամարդ հանրահավաք է անցկացնում ԱԺ քաղաքացիական խաղաղ անհնազանդությունների կազմակերպիչ, ԱԺ «Ելք» խմբակցության ղեկավար Նիկոլ Փաշինյանը:

Ապրիլի 23-ի ցերեկը ՀՀ վարչապետի առաջին տեղակալ Կարեն Կարապետյանը հայտարարեց, որ որոշում է կայացվել դիմել գլխավոր դատախազին՝ պատգամավորներին կալանքից ազատ արձակելու վերաբերյալ:

Այնուհետև Կարեն Կարապետյանն այցելեց Նիկոլ Փաշինյանի հետ հանդիպման:

Ազատ արձակվելով ձերբակալվածների պահման վայրից, Նիկոլ Փաշինյանը հայտարարեց, որ բոլոր հարցերին պատասխան կտա հանրահավաքում:

Այնուհետև վարչապետ Սերժ Սարգսյանը հայտարարեց հրաժարականի մասին:

Ներկայացնում ենք հատվածներ ելույթներից

Արարատ Միրզոյան, ԱԺ պատգամավոր, «Ելք» դաշինք

Օլիգարխները, բիզնեսմենները պետական իշխանության մեջ ներգրավված չեն լինելու:

Պետական իշխանության մեջ ներգրավված մարդիկ բիզնես հնարավորություններ չեն ունենալու:

Մենք պետք է կարգավորենք ընտրական օրենսգիրքը: Պետք է Հայաստանում անցկացվեն ազատ ու արդար ընտրություններ:

Նիկոլ Փաշինյան

Երեկ առավոտյան Մարիոթ հյուրանոցում տեղի ունեցավ իմ և Սերժ Սարգսյանի արդեն հայտնի հանդիպումը: Եվ նա կեսից թողեց-հեռացավ: Այդ պահից իսկ ինձ համար հասկանալի էր, որ նա այլևս հեռացել է նաև վարչապետի պաշտոնից:

Երբ ԱԱԾ աշխատակիցներն ինձ առևանգեցին և տանում էին ոստիկանության Սևանի բաժին, ես հումորներ էի անում: Նրանք, սակայն, ինձ չէին հասկանում: Ես նրանց ասում է, որ այս պահից Հայաստանում կա նոր իշխանություն և նրա անունն է Հայաստանի Հանրապետության ժողովուրդ:

Ինձ պահում էին կատարյալ մեկուսացման պայմաններում, իսկ երբ ինձ այցելեցին բարձրաստիճան պաշտոնյաները, ես հասկացա, որ մենք հաղթել ենք:

Այսօր առավոտյան ինձ առաջարկում էին, որ Սերժ Սարգսյանը հրաժարական տա հոկտեմբերին: Երկու ժամից ինձ առաջարկում էին, որ Սերժ Սարգսյանը հրաժարական տա մեկ ամսից: Հետո առաջարկեցին, որ հրաժարական տա ապրիլի 25-ին: Ես ասացի, որ Սերժ Սարգսյանը պետք է հրաժարական տա երկու ժամվա ընթացքում, և երկու ժամվա ընթացքում հրաժարական տվեց:

Սերժ Սարգսյանի հրաժարականը մեր առաջին պահանջն էր:

Երկրորդ պահանջն է, որ Ազգային ժողովը վարչապետ է նշանակում ժողովրդի թեկնածուին: Դա պետք է տեղի ունենա մեկ շաբաթվա ընթացքում: Դրանից հետո ձևավորվում է ժամանակավոր կառավարություն, որից հետո պետք է տեղի ունենան հնարավոր ամենաշուտ տրամաբանական ժամկետներում արտահերթ խորհրդարանական ընտրություններ:

Մենք ասացինք, որ պատրաստ ենք քննարկել Սերժ Սարգսյանի իշխանությունից հեռացման և իշխանության անցնցում հանձնման պայմանները:

Մենք պատրաստվում ենք չորեքշաբթի, առավոտյան 11-ին Արմենիա Մարիոթ հյուրանոցում շարունակել բանակցությունները իշխանության անցնցում փոխանցման շուրջ վարչապետի ժամանակավոր պաշտոնակատար Կարեն Կարապետյանի հետ: Ես հույս ունեմ, որ ՀՀԿ վերնախավը միանշանակ և անվերապահորեն կճանաչի ժողովրդական թավշյա, ոչ բռնի հեղափոխության հաղթանակը: Եվ այս փաստի արձանագրումը որքան շուտ տեղի ունենա, այնքան ավելի լավ ՀՀ-ի և ԼՂՀ-ի համար:

Ես ուզում եմ, որ մենք միանշանակ և աներկբա արձանագրենք՝ մեր հռչակած թավշյա, ոչ բռնի ժողովրդական հեղափոխությունը չի կարող կիսատ մնալ, այն պետք է շարունակվի մինչև վերջ և ես հույս ունեմ, որ դուք բոլորդ կանգնած եք հանուն այդ վերջնական նպատակի:

Եթե Սերժ Սարգսյանն ու ՀՀԿ-ն հույս ունեն, թե ստեղծվելու է մի իրավիճակ, որ իրենք կարողանալու են ստվերային կառավարում իրականացնել, ես կոչ եմ անում րոպե առաջ մոռանալ դրա մասին: Ժողովուրդը հաղթել է և այդ հաղթանակը պետք է ճանաչվի անվերապահորեն:

Հայաստանում ատելության մթնոլորտը վերացել է: Ես ուզում եմ դիմել նրանց, ովքեր ճամպրուկներն են հավաքում կամ մտածում են հավաքելու մասին, բոլոր նրանք, քաղաքացիները, գործարարները, որոնք մտածում են, թե սկսվելու է վրեժխնդրությունը, վենդետան և կապիտալը մտածում են Հայաստանից հանել, ասում եմ, հարգելիներս, մի արեք այդ բանը, որովհետև վենդետա չի լինելու, ատելություն չի լինելու, վրեժխնդրություն չի լինելու: Հայաստանում լինելու է ազգային միասնության մթնոլորտ:

Շնորհակալություն եմ հայտնում ԼՂՀ իշխանություններին, որ այս ընթացքում ցուցաբերեցին կատարյալ զգոնություն և չեզոքություն և չտրվեցին սադրանքների:

Մենք ձեռք ենք բերել վարչապետի ժամանակավոր պաշտոնակատարի հետ շատ հստակ պայմանավորվածություն՝ բոլոր ձերբակալվածներն ու կալանավորվածները պետք է անհապաղ ազատ արձակվեն:

Ես նախատեսում են, որ նրանք, մինչև այս միջոցառման ավարտը, պետք է առանց բացառության ազատ արձակվեն:

Հաջորդ փուլում մենք պետք է անդրադառնանք քաղբանտարկյալների խնդրին, և բոլոր քաղբանտարկյալներն ազատ պետք է արձակվեն:

Այս պահից սկսած ոստիկանությունը դադարեցնում է անհապաղ մեր շարժման մասնակիցներին բերման ենթարկելու գործընթացը: Բայց ես նաև ուզում եմ, որ մենք շատ հստակ պայմանավորվենք մի հարցում. մեր այսօրվա տոնակատարությունը ոչ մի տհաճ միջադեպով պետք է չստվերվի: Պետք է ոչ մի ծառի ճյուղի վնաս չհասցվի: Կոչ եմ անում զերծ մնալ ալկոհոլի գործածումից: Դա կարող ենք անել երեկոյան, մեր տներում: Կոչ եմ անում բոցառիկ հարգալից վերաբերմունք բոլոր ոստիկանների և իրավապահ համակարգի նկատմամբ: Միաժամանակ ակնկալում և պահանջում եմ, որ ոստիկանությունը նույնպիսի վերաբերմունք ցուցաբերի Հայաստանի հաղթական քաղաքացու նկատմամբ:

Եթե ոչինչ չպատահի, մեր գործողություններն իրականացնում ենք օրվա գործողությունների համատեքստում: Կոչ եմ անում վաղը, ժամը 15-ին այստեղից քայլերթ կկատարենք Ծիծեռնակաբերդ:

Մեր հեղափոխության առաջին փուլն ավարտված է: Խնդրում եմ ինձ լիազորեք ՀՀ առաջին փոխվարչապետի հետ բանակցել իշխանության անցնցում փոխանցելու շուրջ: