Ի՞նչ է ասել Թրամփը Զելենսկուն

Հանրապետական կուսակցությունից ԱՄՆ նախագահի թեկնածու Դոնալդ Թրամփը հայտնել է, որ հեռախոսով խոսել է Ուկրաինայի նախագահ Վլադիմիր Զելենսկու հետ եւ խոստացել դադարեցնել երկրի պատերազմը Ռուսաստանի հետ։

«Ես շնորհակալ եմ նախագահ Զելենսկուն այն բանի համար, որ նա կապի մեջ է մտել, որովհետեւ ես, որպես Միացյալ Նահանգների ձեր հաջորդ նախագահ, խաղաղություն կբերեմ ամբողջ աշխարհում եւ կդադարեցնեմ պատերազմը, որն այդքան կյանքեր է արժեցել եւ կործանել այդքան անմեղ ընտանիքներ»,- գրել է Թրամփը Truth Social սոցցանցում։

Նրա խոսքով՝ «երկու կողմերը կարող են միասին հավաքվել եւ գործարք կնքել, որը վերջ կդնի բռնությանը եւ բարգավաճման ուղի կհարթի»։

Իր հերթին, Զելենսկին հաստատել է զանգը, որի ընթացքում նա շնորհավորել է Թրամփին Հանրապետական կուսակցությունից նախագահի պաշտոնական առաջադրման առիթով, ինչպես նաեւ 78-ամյա նախագահին ցանկացել է առողջություն մահափորձից հետո, որը կատարվել էր մեկ շաբաթ առաջ։

«Մենք պայմանավորվել ենք նախագահ Թրամփի հետ անձնական հանդիպման ժամանակ քննարկել, թե ինչ քայլեր կարող է աշխարհը դարձնել արդար եւ իսկապես ամուր»,- նշել է Զելենսկին Х-ի իր միկրոբլոգում։- Ես նշել եմ ամերիկացիների կենսականորեն կարեւոր երկկուսակցական եւ երկպալատ աջակցությունը մեր ազգի ազատության եւ անկախության պաշտպանության գործում»։

Օրերս ելույթ ունենալով Հանրապետական կուսակցության համագումարում՝ Թրամփը խոստացել էր, որ վերադառնալով Սպիտակ տուն՝ վերջ կդնի աշխարհում յուրաքանչյուր միջազգային կոնֆլիկտի, որը, նրա խոսքով, ստեղծել է Ջո Բայդենի ներկայիս վարչակազմը, այդ թվում ՝ ուկրաինական: