Ադրբեջանի հետ ռազմական առճակատում կլինի, իսկ Հայաստանը «կպաշտպանեն» ՌԴ-ից․ Alphanews.am

Alphanews.am-ը գրում է․ Քաղաքագետ Բենիամին Մաթևոսյանը Alpha News-ի եթերում «Վերնագիր» հեղինակային հաղորդման ընթացքում ներկայացրել է թեմայի շուրջ մասնագիտական վերլուծություն, որում մասնավորապես ասվում է․

(Ամերիկյան հետախուզությունը տեղյա՞կ է Հայաստանի դեմ հնարավոր ագրեսիայի մասին)

«Այսպիսով, ի՞նչ իրավիճակ ունենք այսօր։ Նիկոլ Փաշինյանը բարձրաձայնել է ՀԱՊԿ-ից Հայաստանի դուրս գալու մտադրության մասին: Կրեմլում կարծում են, որ դեռ պետք է ինչ-որ բան քննարկել «հայ գործընկերների հետ, ինչ-որ բան պարզել, ինչ-որ բան բացատրել»։ Փաշինյանի և Կրեմլի անհասկանալի հարաբերությունները թողնենք և խոսենք այլ բաների մասին:

Միևնույն ժամանակ, Հայաստանում (և նրա սահմաններից դուրս) քարոզչության հիմնական թեզերից մեկն այն է, որ տարբեր քաղաքագետներ, փորձագետներ կամ իրենց այդպիսին համարող անձինք հայտարարում են, որ «ՀԱՊԿ-ից դուրս գալով՝ Հայաստանն անցնում է «Արևմտյան անվտանգային հովանոցի տակ»: Ասում են, որ նույնիսկ պարզապես հայտարարելով աշխարհաքաղաքական վեկտորը փոխելու իր մտադրության մասին (նույնիսկ ասվում է, որ Հայաստանը պետք է ԵՄ-ի հետ ստորագրի 2013-ին չստորագրված Ասոցացման փաստաթուղթը), Հայաստանն արդեն ստանում է քաղաքական կապիտալ, որը կվերածվի անվտանգության համակարգի ամրապնդման և կապահովի սպառնալիքների վերահսկելիությունը։

Ավելին, որոշ «փորձագետներ», նույնիսկ ռուս փորձագետներ, ավելի հեռուն են գնում և «Հայաստանի անվտանգության նոր հովանոց ձեռք բերելու» հեռանկարների մասին իրենց մտորումներում նշում են, որ «հենց արևմտյան ռազմական ենթակառուցվածքները տեղակայելու համար ՀՀ-ն պետք է դադարեցնի ՀԱՊԿ անդամակցությունը»։ Տեղացի փորձագետներն էլ առաջ են քաշում այն թեզը, որ «անցումային շրջանում Արևմուտքի քաղաքական երաշխիքները բավարար կլինեն պատերազմից խուսափելու համար, մինչդեռ Հայաստանը երկրից դուրս կբերի մեկ կոնտինգենտի և կներդնի մեկ այլ կոնտինգենտի»: Բայց թողնենք քարոզչությունն ու բացահայտ ապուշ մտքերը, թե «անհրաժեշտության դեպքում ԱՄՆ-ը Հայաստանին զենք ու զինամթերք կմատակարարի նույնիսկ Թուրքիայի և Ադրբեջանի տարածքով» և վերլուծենք իրավիճակը։

1. Ինչպե՞ս է ստացվում, որ եթե, քարոզիչների կարծիքով, «Հայաստանն անցնում է Արևմուտքի անվտանգային հովանոցի ներքո, և մինչ արևմտյան կոնտինգենտի մուտքը Հայաստան, Արևմուտքի քաղաքական երաշխիքները կբավականացնեն անվտանգությունն ապահովելու համար», Ամերիկյան հետախուզությունը կարծում է, որ կարող է լինել ռազմական հակամարտություն Հայաստանի և Ադրբեջանի միջև, առճակատում, որը, հավանաբար, սահմանափակ է լինելու տևողությամբ և ինտենսիվությամբ: Ավելին, նշվում է, որ զինված առճակատման վտանգը մեծացնում է Բաքվի՝ Նախիջևան ցամաքային միջանցք ձեռք բերելու ցանկությունը։
Ի՞նչ է, ամերիկյան հետախուզությունը չի կարդում Փաշինյանի հետ փոխկապակցված հայ «փորձագետներին», որոնք մինչ Արցախի անկումը բոլորին համոզում էին, որ Ֆրանսիան ճանաչելու է Արցախի անկախությունը, իսկ այսօր ասում են՝ «Արևմուտքը պաշտպանելու է հայկական ժողովրդավարությունը»։
2. Ինչպե՞ս է ստացվում, որ ամերիկյան հետախուզության տվյալներով, առճակատումը լինելու է Ադրբեջանի հետ, մինչդեռ Բրիտանիան (և դատելով Նիկոլ Փաշինյանի վերջին ասուլիսից նաև Հայաստանը) պատրաստվում են պաշտպանել Հայաստանը Ռուսաստանից։

Ուրեմն ո՞վ է մոլորեցնում Հայաստանի ժողովրդին՝ ՀՀ իշխանությունները, բրիտանացի պաշտոնյան, թե՞ ԱՄՆ հետախուզությունը։
Մտածե՛ք այդ մասին…»։