Եթե ԱՄՆ-ը շարունակի այն, ինչ անում է, ԱՄՆ-ի դեմ նոր ճակատներ կբացվեն. Իրանի արտգործնախարար

Իրանի արտաքին գործերի նախարար Հոսեյն Ամիր Աբդոլլահիանը հայտարարել է, որ Վաշինգտոնի լիակատար աջակցությունն Իսրայելին կարող է հանգեցնել ԱՄՆ-ի դեմ նոր ճակատների բացմանը:

«Միացյալ Նահանգները մյուսներին խորհուրդ է տալիս զսպվածություն դրսևորել, բայց ինքը լիովին աջակցում է Իսրայելին», - ասել է նա Bloomberg-ին տված հարցազրույցում: 

«Եթե ԱՄՆ-ը շարունակի անել այն, ինչ անում է, ԱՄՆ-ի դեմ նոր ճակատներ կբացվեն»,-ընդգծել է Իրանի գլխավոր դիվանագետը։

Նրա խոսքով, հակամարտության սրումը կհանգեցնի Գազայի հատվածի բնակչության հետագա սպանդի, և արդյունքում «իրավիճակը կարող է դուրս գալ վերահսկողությունից ողջ տարածաշրջանում»։ 

«Ամերիկյան կողմը պետք է որոշի՝ իրո՞ք ցանկանում է պատերազմի սրացում և վատթարացում»,- նշել է Աբդոլլահիանը։

«Նոր ճակատների բացումն անխուսափելի է, և դա կստիպի Իսրայելին զղջալ իր գործողությունների համար»,- ասել է նա։ – [Իրավիճակը] պայթյունի եզրին է. Ամեն ինչ հնարավոր է, ցանկացած ճակատ կարող է բացվել»:

«Մենք նոր զորքեր չենք ուղարկել Սիրիա կամ տարածաշրջանի այլ շրջաններ։ Բայց այնպես չէ, որ միայն հետևում ենք կատարվողին։ Իրանի Իսլամական Հանրապետությունը գործելու է իր ազգային շահերին համապատասխան»,- եզրափակել է նա։