Բաքուն հայտարարում է Հայաստանի հետ խաղաղության պատրաստակամության մասին

Ադրբեջանի արտաքին գործերի նախարար Ջեյհուն Բայրամովն ընդունել է Պետքարտուղարության Եվրոպայի և Եվրասիայի հարցերով ԱՄՆ պետքարտուղարի օգնականի տեղակալ Ջոշուա Հաքին։ Այս մասին հայտնում են ադրբեջանական լրատվամիջոցները՝ հղում կատարելով Ադրբեջանի ԱԳՆ-ին։

«Իր զրուցակցին մանրամասն տեղեկացնելով տարածաշրջանում տիրող իրավիճակին՝ Բայրամովն ընդգծել է, որ Ադրբեջանի կողմից իրականացվող հակաահաբեկչական միջոցառումների արդյունքում դադարեցվել է Հայաստանի զինված ուժերի և անջատողական ռեժիմի ներկայությունը երկրում՝ դրանով իսկ հաջողվել է վերացնել Ադրբեջանի և Հայաստանի միջև խաղաղության պայմանագրի ստորագրման ամենամեծ խոչընդոտներից մեկը։ Նախարարն ասել է, որ Ադրբեջանը, ինչպես միշտ, հաստատակամ է խաղաղության օրակարգը առաջ տանելու հարցում և նշել է այս համատեքստում միջազգային հանրության կառուցողական դիրքորոշման կարևորությունը»,- ասվում է  գերատեսչության հայտարարության մեջ։

Հիշեցնենք, որ սեպտեմբերի 19-20-ը տեղի ունեցած ագրեսիայի և էթնիկ զտումների արդյունքում, որն Ադրբեջանում անվանում են «հակաահաբեկչական միջոցառում», տարածաշրջանի ողջ բնիկ հայ բնակչությունը լքել է Լեռնային Ղարաբաղը։