Երևանի ընտրությունները դա «ոստիկանական շղթան» հաղթահարելու հնարավորությունն է․ Ստեփան Դանիելյան

Ստեփան Դանիելյանը ֆեյսբուքյան իր էջում գրում է․

Շատերն են հարցնում, թե ինչու է ցուցակը գլխավորում Անդրանիկ Թեւանյանը։ Հիմնավոր կերպով բացատրեմ։
Թեւանյանը ցուցակը գլխավորել է շարժման ձեւավորման բնականոն ընթացքի տրամաբանության մեջ։ Նախ, շարժման գաղափարն իրենն էր' ամիսներ շարունակ մարդկանց է համախմբել, առանձին-առանձին հանդիպել, ում պետք է' համոզել, ում համոզել պետք չի' ոգեւորելը, կազմակերպել, միմյանց հետ ծանոթացրել, վերջապես' թիմ ձեւավորել։ Դա քրտնաջան ու ծանր աշխատանք է եղել ու դեռ առջեւում ավելի շատ էներգիա ու ջանքեր է ծախսվելու։ Դաշինքի կուսակցություններն այս հարցում համերաշխ են։
Հիմա նպատակի մասին.
- ՔՊ չպետք է հաղթի Երեւանի ընտրություններում (կարծում եմ պետք չէ բացատրել, թե ինչու), ինչին պետք է հաջորդի իշխանափոխության ընթացքը։ Դա է մեր հիմնական նպատակն ու դրա համար այդ նպատակը կիսողները պետք է ունենան համապատասխան մասնակցային ցուցակ, որ այդպես մտածողները գնան տեղամասեր, այլ ոչ թե մնան տանն' իրենց տեսակն արտահայտող մասնակցի բացակայության պատճառով ու կանաչ լույս վառեն ՔՊ-ի համար։
Այդ դեպքում դաշտում կմնաին ՔՊ-ն ու ՔՊ-ի արբանյակները: Իսկ դա ինչ հետեւանք կունենա Արցախի, Սյունիքի եւ, առհասարկ, Հայաստանի համար, պետք է ակնհայտ լինի։
Հիմա հիմնական երկու խոսույթների մասին։
1. Ինչու ընդդիմությունը միասնական թեկնածու չունի։ Այդ հարցով դիմեք ընդդիմություններին։ Այս պահին Մայր Հայաստանն է ռադիկալ նպատակով հանդես գալիս։ Ի դեպ, քաղաքի ընտրություններին մասնակցում են կուսակցություններ, այսինքն, սա քաղաքական գործընթաց է, այլ ոչ թե շինարարական, կամ տրանսպորտային տենդերի մրցույթ։
2. Պետք է բոյկոտել ընտրությունները, որովհետեւ կկեղծեն, կձերբակալեն, կբանտարկեն եւ այլն։ Շատերն անկեղծ են այս հարցում, սակայն չունեն բոյկոտին հաջորդող քայլը։ Սա նման է նրան, որ մարդիկ գնում են Լաչինի միջանցքն ուժով բացելու, հետո բողոքում են, որ հայ ոստիկաններն իրենց թույլ չեն տալիս մոտենալ կամրջին։ Բնական հարց է առաջանում, եթե ոստիկանական արգելքը չեն կարողանում հաղթահարել, ապա ինչպես են բացելու ճանապարհը։
Երեւանի ընտրությունները դա "ոստիկանական շղթան" հաղթահարելու հնարավորությունն է, որպեսզի կատարվի հաջորդ քայլը։
Հ.Գ. Դաշինքը շատ ավելի բազմաքանակ ու ներկայացուցչական է, քան ցուցակն, ինչում կհամոզվեք ընտրարշավի ժամանակ։ Ցուցակը լոկ աշխատանքային գործիքներից մեկն է մեր գլխավոր նպատակին հասնելու համար։