Սորոսի հիմնադրամը երեխաներին կկրթի ճամբարում

Հունիսի 19-ից մեկնարկել է դպրոցականների ամառային հանգստի կազմակերպման այս տարվա ծրագիրը, որում ընդգրկված է 7-13 տարեկան 4680 երեխա: Ծրագրի շրջանակում հունիսի 19-ից օգոստոսի 15-ն ընկած ժամանակահատվածում 6 ճամբարներում երեք հերթափոխով 20-ական օրով կհանգստանան զոհված, հաշմանդամ դարձած զինծառայողների և աշխարհազորայինների, ծնողազուրկ ու անապահով բազմազավակ ընտանիքների դպրոցահաuակ երեխաները։ Այս մասին տեղեկացնում է ՀՀ կրթության, գիտության, մշակույթի և սպորտի նախարարությունը:

Ամառային հանգստի շրջանակում երեխաների համար  կկազմակերպվի ֆիզիկական և գեղագիտական դաստիարակությանն ուղղված ճամբարային ծրագիր, որում ներառված են տարբեր միջոցառումներ` միտված դպրոցականների ճաշակի ձևավորմանը, ազգային ավանդույթների պահպանմանը, բնապահպանական, հայրենասիրական ու կարգապահական դաստիարակությանը, ստեղծագործական կարողությունների զարգացմանը:

Նախատեսված են նաև հատուկ դասընթացներ արտակարգ իրավիճակներում ճիշտ կողմնորոշվելու, առաջին օգնություն ցուցաբերելու վերաբերյալ: 

Նշենք, որ 2019 թվականի դպրոցականների ամառային հանգստի կազմակերպումն ապահովելու նպատակով  ՀՀ վարչապետի որոշմամբ  ստեղծվել է միջգերատեսչական հանձնաժողով:

Ծրագիրն իրականացնում է ՀՀ կրթության, գիտության, մշակույթի և սպորտի նախարարությունը:

Ճամբարներ մեկնող երեխաների ցուցակագրումն իրականացրել են ՀՀ մարզպետարանները` համայնքներից ստացված հայտերի հիման վրա:

Հիշեցնենք՝ մամուլը գրել էր, որ  ՀՀ կրթության, գիտության, մշակույթի և սպորտի նախարարությունը, պարզվում է, Սորոսի «Բաց հասարակության հիմնադրամներ-Հայաստան» կազմակերպության և ՄԱԿ-ի պարենի համաշխարհային ծրագրի հետ հա­մատեղ՝ ՀՀ Արարատի մարզում կազմակեր­պում է փորձնական ամառային դպրոց։

«Առաջին հայացքից բավական գայթակղիչ թվացող այս հայտարարության տակ, թե ինչ ականներ են թաքնված, իհար­կե, դեռ վաղ է կանխատեսել, սակայն, որ նախարարության թեթև ձեռքով սորոսականները հիմա էլ երեխաներին ճամբար են տա­նում, ոչ մի լավ բանի մասին չի հուշում՝ հաշ­վի առնելով, որ Սորոսի հիմնադրամը ոչ մի­այն Հայաստանում, այլ ամբողջ աշխարհում աչքի է ընկել ավելի շատ պետություններ քանդելով ու այլասերվածություն տարածե­լով, քան թե դեռահասների կրթության մա­սին հոգ տանելով»,- գրել էր «Իրավունք» թերթը։