Խախտվել է պարզ դատավարական կանոնը, բացարկ է հայտնվել դատարանի ողջ կազմին. Զոհրաբյան

Առողջապահության նախարարի հայտնի նորմատիվ հրամանի դեմ վարչական դատարանին դիմում ենք ներկայացրել, խնդրելով նաև կիրառել դիմումի ապահովման միջոց, այն է՝ կասեցնել հրամանի գործողությունը մինչև դատաքննության ավարտը: Այս մասին ֆեյսբուքյան իր էջում գրել է Արա Զոհրաբյանը՝ հայտնելով, որ հայցադիմումը մակագրվել է Միքայել Մելքումյանին, Դանիել Դանիելյանին. Կարեն Զարիկյանին, Ռաֆիկ Խանդանյանին և Արմեն Ներսիսյանին և դատարանի ողջ կազմին բացարկ հայտնելու միջնորդություն է ներկայացվել։ 

«ՄԱԿԱԳՐՈՒԹՅՈՒՆԸ ՎԱՐՉԱԿԱՆ ԴԱՏԱՐԱՆՈՒՄ

Ինչպես արդեն գիտեք, քրեական գործով դատարաններում գործերի բաշխման համակարգչային ծրագիրն առգրավելու պատճառով, որոշ դատարաններում, այդ թվում՝ ՀՀ վարչական դատարանում, գործերի բաշխումը կատարում է տվյալ դատարանի նախագահը:

Առողջապահության նախարարի հայտնի նորմատիվ հրամանի դեմ վարչական դատարանին դիմում ենք ներկայացրել, խնդրելով նաև կիրառել դիմումի ապահովման միջոց, այն է՝ կասեցնել հրամանի գործողությունը մինչև դատաքննության ավարտը:

Ըստ datalex.am տեղեկությունների, մեր դիմումը մակագրվել է հետևյալ դատավորներին՝

1. Մելքումյան Միքայել Գագիկի (նախագահող)
2. Դանիելյան Դանիել Սամվելի
3. Զարիկյան Կարեն Բարսեղի
4. Խանդանյան Ռաֆիկ Գագիկի
5. Ներսիսյան Արմեն Գոգոլի

Օրենսդիրն այս իրավիճակում չի թողել դատարանի նախագահի քմահաճույքին, և խաղի կանոն է սահմանել: ՀՀ դատական օրենսգրքի 41-րդ հոդվածի 4-րդ մասի համաձայն՝ Եթե անհաղթահարելի ուժի հետևանքով գործերի բաշխումը հնարավոր չէ իրականացնել

Համակարգչային ծրագրի միջոցով, ապա գործերը՝ ըստ դատավորների ազգանունների այբբենական հերթականության ….. դատավորների միջև հավասարաչափ բաշխում է դատարանի նախագահը:

Ներկայացնում եմ Վարչական դատարանի Երևանի նստավայրի դատավորների ցանկը ըստ ազգանունների այբբենական հերթականության՝

1. Ազրոյան Ռուզաննա Արայիկի
2. Այվազյան Հրաչ Մարտունի
3. Առաքելյան Գրիգոր Սամվելի
4. Ավագյան Արթուր Ռաֆայելի
5. Դանիելյան Դանիել Սամվելի
6. Դարբինյան Աղասի Սամվելի
7. Զարիկյան Կարեն Բարսեղի
8. Խանդանյան Ռաֆիկ Գագիկի
9. Ծատուրյան Արթուր Արշավիրի
10. Համբարձումյան Մերի Գևորգի
11. Հարությունյան Ալեքսանդրա Ալեքսեյի
12. Հարությունյան Անի Գրիգորի
13. Հովակիմյան Սամվել Սերյոժայի
14. Ղազարյան Արգիշտի Անդրանիկի
15. Մելքումյան Միքայել Գագիկի
16. Միրզոյան Արծրուն Մարտունի
17. Պետրոսյան Մհեր Ղարիբի
18. Սոսյան Գևորգ Միքայելի

Դատական օրենսգրքի վերոնշված կանոնից պարզ է դառնում, որ վարչական դատարանի նախագահը, եթե Մելքումյան Միքայելից է սկսել (ցանկի 15-րդը), ապա պետք է ներգրավեր հետևյալ հաջորդ չորս դատավորներին՝ Միրզոյան Արծրունին (16), Պետրոսյան Մհերին (17), Սոսյան Գևորգին (18) և Ազրոյան Ռուզաննային (1-ին, քանի որ ցուցակը 18-ով ավարտվում է և սկսվում է 1-ից):

Այս պահին չգիտենք Մելքումյան Միքայելին գործ մակագրելը համապատասխանում է ՀՀ դատական օրենսգրքի 41-րդ հոդվածի պահանջին, քանի որ չունենք բավարար չափով տեղեկություն, թե արդյոք մակագրման իր հերթն էր հասել, սակայն մյուս դատավորների մասով, մեր կարծիքով, խախտվել է այդ պարզ դատավարական կանոնը: Թե ինչու է խախտվել, արդեն մտահոգություններ են առաջացնում և կասկածներ:

Այս հիմքով բացարկ է հայտնվել դատարանի ողջ կազմին»,- գրել է Զոհրաբյանը։