16 08 2019

«Հայանտառ»-ի պաշտոնյաները 131 մլն դրամի վնաս են պատճառել․ դատախազություն

«Հայանտառ»-ի պաշտոնյաները 131 մլն դրամի վնաս են պատճառել․ դատախազություն

Դեռեւս 2016թ. ՀՀ գլխավոր դատախազությունում ուսումնասիրվել են «Հայանտառ» ՊՈԱԿ-ի կողմից պետական անտառային ֆոնդի հողերը վարձակալության տրամադրելու վերաբերյալ ՀՀ գյուղատնտեսության նախարարության ներքին աուդիտի հաշվետվությունները, ինչպես նաեւ դրա հիմք հանդիսացող փաստաթղթերի պատճենները: Այս մասին հայտնում են ՀՀ դատախազության հանրային կապերի բաժնից։

Պարզվել է, որ վարձավճարների չափերը սահմանելու եւ պայմանագրերում համապատասխան փոփոխություններ կատարելու, ինչպես նաեւ չվճարված վարձավճարները գանձելու գործընթացում առկա են մի շարք թերություններ եւ խախտումներ, որոնք վերացնելու ուղղությամբ միջոցներ ձեռնարկելու վերաբերյալ ՀՀ գլխավոր դատախազի կողմից ներկայացվել է հաղորդում ՀՀ գյուղատնտեսության նախարարին:

Միաժամանակ, ՀՀ գլխավոր դատախազի կողմից պետական շահերի պաշտպանության վարչությանը հանձնարարվել է պարբերաբար հետեւել աշխատանքների կատարման ընթացքին: Սակայն աշխատանքների կատարման ընթացքի մասին ստացված միջանկյալ, իսկ 2019թ. մարտի 22-ին ներկայացված ամփոփ տեղեկությունների ուսումնասիրությամբ ակնհայտ է դարձել, որ ՊՈԱԿ-ի պաշտոնատար անձանց կողմից անցած ժամանակահատվածում օրենքով նախատեսված գործուն միջոցներ չեն ձեռնարկվել պետության եւ ՊՈԱԿ-ի իրավունքներն ու օրինական շահերը պաշտպանելու ուղղությամբ:

Ուստի ՊՈԱԿ-ում նախաձեռնվել է 2006-2018թ.թ. պետական անտառային ֆոնդի հողերի վարձակալման գործընթացին, այդ թվում՝ վարձակալության պայմանագրերի կնքմանը, վարձավճարների գանձմանը, հայցերի հարուցմանը, դատական գորընթացներին եւ կատարողական վարույթներին առնչվող փաստաթղթերի մեծածավալ ուսումնասիրություն, որի արդյունքում պարզվել է, որ արձանագրված խախտումները ոչ միայն չեն վերացվել, այլեւ ՊՈԱԿ-ի պաշտոնատար անձանց վարքագծում առերեւույթ առկա են հանցագործության հատկանիշներ, որոնցով պետությանը պատճառվել է նյութական վնաս:

Այսպես, ՊՈԱԿ-ի հարուցած հայցերի ուսումնասիրությամբ պարզվել է, որ ՊՈԱԿ-ի պաշտոնատար անձինք 2006-2018թ.թ. ընթացքում, չարաշահելով իրենց պաշտոնեական դիրքը, սահմանված ժամկետում հայցեր հարուցելու, անհիմն դատական ակտերը բողոքարկելու. ինչպես նաեւ հայցը բավարարելու մասին օրինական ուժ ստացած դատական ակտերը կատարման ներկայացնելու պարտականությունները չեն կատարել, որի արդյունքում պետությանը պատճառել են 131.146.423 ՀՀ դրամի նյութական վնաս, անզգուշությամբ առաջացնելով ծանր հետեւանքներ:

Ուստի դեպքի առթիվ ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ՝ ՀՀ քրեական օրենսգրքի 308-րդ հոդվածի 2-րդ մասով:

Նախաքննությունը հանձնարարվել է ՀՀ քննչական կոմիտեին:

Միաժամանակ 145 մլն. ՀՀ դրամի չափով պայմանագրային պարտավորությունները չկատարած շուրջ 100 վարձակալներից վնասն ամբողջությամբ հատուցելու, ինչպես նաեւ արձանագրված թերությունները վերացնելու ուղղությամբ գործուն միջոցներ ձեռնարկելու ուղղությամբ նախապատրաստվում է հաղորդում:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ