Դատավորը կեղծ փաստաթուղթ է կցել գործին. Վահագն Հարությունյանի փաստաբան․ News.am

ՀՀ վերաքննիչ քրեական դատարանը, նախագահությամբ դատավոր Մհեր Արղամանյանի, փետրվարի 1-ին քննել է Մարտի 1-ի գործով քննչական խմբի նախկին ղեկավար Վահագն Հարությունյանի նկատմամբ կալանավորումը որպես խափանման միջոց ընտրելու վերաբերյալ նրա պաշտպանի ներկայացրած բողոքը:

Պաշտպան Միհրան Պողոսյանի պնդմամբ՝ դատարանի կազմից իր հետ չեն փորձել կապ հաստատել, ինքը պատշաճ ծանուցված չի եղել նիստի օրվա և ժամի վերաբերյալ:

Պաշտպանը NEWS.am-ի հետ զրույցում ասել է, որ նիստի ընթացքում անդրադարձ է կատարվել նաև իրենց պաշտպանական իրավունքի իրացման խախտումներին:

Ըստ Միհրան Պողոսյանի՝ դատարանի կողմից նախկինում կատարված ապօրինությունները քողարկելու համար նոր կեղծիք է կատարվել:

«Վերաքննիչ դատարանում ծանոթացա, որ, իբր, գործում առկա է հեռախոսագիր այն մասին, որ ինձ հետ փորձել են կապվել, և ես չեմ պատասխանել հեռախոսազանգին»,- ասաց Միհրան Պողոսյանը:

Պաշտպանի խոսքով՝ անգամ եթե իր հետ փորձեին կապվել և ինքը հեռախոսազանգերին չպատասխաներ, իրավական առումով դա որևէ նշանակություն չէր ունենա, անգամ այդ դեպքում չէր կարելի համարել, որ ինքը պատշաճ ծանուցվել է նիստի մասին:

«Դատարանը կեղծիքի է գնացել, ու իմ վստահորդի հետ քննարկելուց հետո մենք գործողություններ ենք իրականացնելու՝ ընդհուպ պաշտոնեական կեղծիք կատարելու հանցակազմի առկայության հիմքով հաղորդում ներկայացնելը Հատուկ քննչական ծառայություն, որպեսզի պարզվի, թե այդ իրականությանը չհամապատասխանող, կեղծ փաստաթուղթն ով է դրել շրջանառության մեջ»,- ասել է նա:

Փաստաբանը նշել է, որ Վահագն Հարությունյանի նկատմամբ կալանքը որպես խափանման միջոց ընտրելու որոշումից հետո ինքը գնացել և դատարանում ծանոթացել է գործի նյութերին, արձանագրել, որ գործում չկա այն հեռախոսագիրը, որը հայտնվել է Վերաքննիչ դատարանում առկա գործի նյութերում: