Ընդդիմադիրների նոր նախագիծը․ «Ժողովուրդ»

«Ժողովուրդ» օրաթերթը գրում է. «Ժողովուրդ» օրաթերթը տեղեկացավ, որ ՀՀ Ազգային ժողովի «Հայաստան» խմբակցության պատգամավորներ Իշխան Սաղաթելյանը, Արամ Վարդևանյանն ու Աղվան Վարդանյանը հանդես են եկել նոր օրենսդրական նախաձեռնությամբ եւ առաջարկում են փոփոխություններ կատարել ՀՀ քրեական դատավարության օրենսգրքում:

Մասնավորապես, ընդդիմադիր պատգամավորներն առաջարկում են օրենսգրքի 301 հոդվածը ավելացնել նոր՝ 301.2 հոդվածով եւ այն վերնագրել՝ «Հոդված 301.2 Հայաստանի Հանրապետության տարածքային ամբողջականության դեմ ուղղված հրապարակային արտահայտությունները, նշված հանցանքի կատարումը հրապարակայնորեն արդարացնելը կամ քարոզելը»: Ըստ այդմ, վերը նշված հանցանքների համար ընդդիմադիր պատգամավորներն առաջարկում են տուգանք՝ նվազագույն աշխատավարձի հազարապատիկից երկուհազարապատիկի չափով, կամ ազատազրկմամբ՝ երկուսից չորս տարի ժամկետով, իսկ Հայաստանի Հանրապետության ինքնիշխանությունից հրաժարվելուն կամ այն սահմանափակելուն ուղղված հրապարակային արտահայտությունները, նշված հանցանքի կատարումը հրապարակայնորեն արդարացնելը կամ քարոզելը պատժվում է տուգանքով՝ նվազագույն աշխատավարձի երկուհազարապատիկից երեքհազարապատիկի չափով, կամ կամ ազատազրկմամբ՝ երեքից հինգ տարի ժամկետով:

Ընդդիմադիր խմբակցության պատգամավորները նաեւ հիմնավորում են ներկայացրել եւ նշում են. «Արցախյան 44-օրյա պատերազմից հետո մի կողմից Հայաստանի Հանրապետության ինքնիշխան տարածքի առանձին հատվածներ դարձել են թշնամական պետության զինված հարձակումների թիրախ, մյուս կողմից՝ Հայաստանի Հանրապետության ինքնիշխան տարածքի վերաբերյալ ՀՀ առանձին պաշտոնատար անձանց եւ քաղաքական, հասարակական եւ հանրային գործիչների երկիմաստ հայտարարություններն ամրապնդում եւ դեռ մի բան էլ խրախուսում են թշնամական պետության մտադրությունն առանց որեւէ իրավական հիմքի ՀՀ ինքնիշխան տարածքի որոշ հատվածներ իրենց վերահսկողության տակ վերցնելու միջոցով Հայաստանի Հանրապետությանը պարտադրելու ոչ շահեկան, ՀՀ անվտանգային շահերը ոտնահարող, ՀՀ քաղաքացիների կյանքի եւ առողջությանը լրջագույն սպառնալիք հանդիսացող եւ պետական կառավարման համակարգի էֆեկտիվ գործունեությունը խաթարող պարտավորություններ, այդ թվում սահմանազատման եւ սահմանագծան հարցերով»:

Ամբողջական հոդվածը՝ օրաթերթի այսօրվա համարում