Ռոբերտ Քոչարյանը չէր կարող ինքն իրեն տապալել. դա նոնսենս է. Մոդեստ Կոլերով. «Հրապարակ»

«Հրապարակ» թերթը գրում է. «Ռուսաստանցի փորձագետները չեն կարծում, որ Լավրովի հայտարարությունը միջամտություն էր Հայաստանի ներքին գործերին: Մասնավորապես, մեզ հետ զրույցում նման կարծիք հայտնեց «Ռեգնում» լրատվական գործակալության գլխավոր խմբագիր, քաղաքագետ Մոդեստ Կոլերովը:

- Պարոն Կոլերով, ինչպե՞ս կմեկնաբանեք Լավրովի հայտարարությունը, որ Մոսկվայում մտահոգված են Հայաստանում «հայտնի քաղաքական գործիչների» նկատմամբ սկսված քաղաքական հետապնդումներով: Չե՞ք կարծում, որ սա միջամտություն է Հայաստանի ներքին գործերին:

-Ոչ, չեմ կարծում:

- Ինչո՞ւ:

-Որովհետև Հայաստանը հանդիսանում է Ռուսաստանի դաշնակիցը, և դաշնակցի կայունությունը, անշուշտ, անհանգստացնում է բոլոր նրանց, ովքեր իր բարեկամներն են: Երբ ձեզ մոտ հարցեր են առաջանում, թե արդյոք այս կամ այն հայտարարությունը հանդիսանում է միջամտություն Հայաստանի ներքին գործերին, պատկերացրեք, որ այդ հայտարարությունն անում է Միացյալ Նահանգների նախագահը կամ պետքարտուղարը, և այդ ժամանակ պարզ կլինի՝ պատրա՞ստ եք արդյոք ընդունել այդ սխեման, թե՞ ոչ: Այնպես որ, ես այստեղ որևէ տարբերություն չեմ տեսնում:

- Ես կմեջբերեմ մի հատված այն պատասխանից, որը ՀՀ ԱԳՆ մամուլի խոսնակը տվել է՝ պատասխանելով թեմային վերաբերող հարցին: Տիգրան Բալայանն ասել է. «Մենք հետևում ենք միջազգային արձագանքներին Հայաստանում տեղի ունեցող ներքին գործընթացների շուրջ, որոնք պայմանավորված են կառավարության ներքին առաջնահերթություններ հանդիսացող իրավական պետության և արդարադատության անկախ համակարգի կայացմամբ, կոռուպցիայի դեմ պայքարով։ Այս գործընթացները փոխկապակցված չեն Հայաստանի արտաքին քաղաքականության հետ և չպետք է տարընթերցման առիթ հանդիսանան»: Ինչպե՞ս կմեկնաբանեք այս հայտարարությունը:

-Որքան ես գիտեմ՝ Ռոբերտ Քոչարյանը մեղադրվում է սահմանադրական կարգը տապալելու փորձի համար: Տիգրան Բալայանի հայտարարության մեջ կա՞ն խոսքեր դրա մասին:

- Նա խոսում է իրավական պետության կայացմանն ուղղված գործընթացների մասին: Կարելի է հասկանալ՝ ինչ ենթատեքստ ունեն այս խոսքերը:

-Իրավական պետությունը մեղադրանքի ճշգրիտ ձևակերպումն է՝ Հայաստանի Հանրապետության սահմանադրական կարգը տապալելու մասին: Վերջ: Տիգրան Բալայանի հայտարարության մեջ հիշատակվո՞ւմ սահմանադրական կարգի տապալման փորձի մասին: Ո՛չ, չի հիշատակվում: Նշանակում է՝ մենք չենք կարող ասել, որ Տիգրան Բալայանի հայտարարությունն առնչվում է Սերգեյ Լավրովի հայտրարությանը:

- Լավրովն ասում է, թե «մենք, որպես Երևանի դաշնակից, միշտ հետաքրքրված ենք եղել հայկական պետության կայունությամբ»: Այսինքն՝ այսպե՞ս են Ռուսաստանն ու Սերգեյ Լավրովը պատկերացնում կայուն պետությունը, որ իշխանությունները կարող են թալանել, սպանել, բայց նրանց չի կարելի դատել, որովհետև դա կվնասի երկրի կայունությա՞նը:

-Դուք հիմա ձեր խոսքերով շարադրեցիք Լավրովի հայտարարությո՞ւնը: Ե՞րբ է Լավրովն ասել, որ կարելի է գողանալ:

- Ո՛չ, դա իմ հարցն է, որովհետև հիմա կալանավորված է Ռոբերտ Քոչարյանը, որը մեղադրվում է «Մարտի 1»-ի գործով:

-Քոչարյանը մեղադրվում է գողության համա՞ր:

- Չի բացառվում, որ հետագայում կարող է նաև այդպիսի մեղադրանք առաջադրվել:

-Քոչարյանը հիմա մեղադրվո՞ւմ է գողության համար:

- Նա մեղադրվում է 2008 թ. մարտի 1-2-ին տեղի ունեցած իրադարձությունների գործով:

-Ձեր մեկնաբանությունը կապ չունի Սերգեյ Լավրովի հայտարարության հետ: Լավրովը մի բառ չի ասել գողության մասին:

- Ինչո՞ւ եք կառչել այդ բառից: Իսկ 10 հոգու սպանությո՞ւնը:

-Դուք ասել եք՝ թալանել, սպանել և այլն:

- Այո, ասել եմ:

-Իսկ Լավրովը նման բան ասե՞լ է:

-Ներեցեք, դուք չեք հասկացել իմ հարցը: Նա ասում է, թե «մենք հետաքրքրված ենք հայկական պետության կայունությամբ»:

-Իսկ դուք հետաքրքրվա՞ծ եք ձեր պետության կայունությամբ:

- Այո, հետաքրքրված ենք:

-Լավրովն ասում է, որ երկրորդ նախագահ Ռոբերտ Քոչարյանին ներկայացված մեղադրանքը սպառնում է երկրի կայունությանը:

- Դա իր կարծի՞քն է:

-Այո: Մի՞թե Քոչարյանը մեղադրվում է գողության համար:

- Նա մեղադրվում է «Մարտի 1»-ի գործով, երբ սպանվեց 10 մարդ:

-«Մարտի 1»-ի գործը մեղադրանքն է սահմանադրական կարգը տապալելու փորձի համար: Իմ կարծիքով՝ եթե Ռոբերտ Քոչարյանի գործով դատական գործընթացը սահմանադրական կարգը տապալելու մեղադրանքով արդար լինի, ապա այդ մեղադրանքը կփլուզվի: Գործող նախագահը չի կարող ինքն իրեն տապալել: Դա նոնսենս է:

- Այդ նույն բառերն ասաց Ռոբերտ Քոչարյանը:

-Շատ լավ: Եթե նույնիսկ Քոչարյանն ասի, որ 2x2=4, ես պիտի կասկածե՞մ դրան: 2x2=4: Գործող նախագահը չի կարող ինքն իրեն տապալել: Դա նոնսենս է: Երբեմն մեր կարծիքները համընկնում են»;

Նյութն ամբողջությամբ կարդացեք «Հրապարակ»-ում: