Ըստ Փաշինյանի և Քերոբյանի՝ կունենանք գրանցված աշխատատեղերի ռեկորդ ՀՀ պատմության մեջ

Կառավարության այսօրվա նիստին Նիկոլ Փաշինյանը հայտարարեց, որ տնտեսության վերականգնման հերթական ազդակն են ստացել:

«Կարող ենք արձանագրել, որ 2021 թվականի մարտին մենք աշխատատեղերի եկամուտ ու աշխատավարձ ունեցող աշխատատեղերի թվի աճ ենք ունեցել», - ասաց նա:

ՊԵԿ նախագահ Էդուարդ Հովհաննիսյանն ասաց, որ անցյալ տարվա համեմատ 0-ից բարձր վարձատրվող աշխատատեղերը ավելացել են 2500-ով: Նրա խոսքով՝ հարկման բազան կազմել է ավելի քան 131 միլիարդ, որը 2020 թվականի համեմատ ավելի է 7,5 միլիարդով:

«Միջին հարկման բազան կազմել է 211 հազար 5 հարյուր, որը 2020 թվականի նկատմամբ՝ ավել է 12 հազարով», - ասաց ՊԵԿ նախագահը:

Նա նշեց, թե թվերի հավաստիության մասով կասկածելն անմտություն է: Վարչապետն ասաց, թե 2018 թվականի նկատմամբ՝ այս տարի կա 85 հազար 38 աշխատատեղի տարբերություն:

Էկոնոմիկայի նախարար Վահան Քերոբյանն էլ իր հերթին արձագանքեց, թե վերլուծությունները ցույց են տալիս, որ սա տնտեսական աճի հետևանք է:

«Այս տեմպերով որ գնանք, կունենանք գրանցված աշխատատեղերի ռեկորդ Հայաստանի պատմության մեջ», - ասաց նախարարը: