Քարոզարշավից հետո տնտեսությունը կզարգանա․ վարչապետի հերթական խոստումը

ԱԺ-ում կառավարության հետ հարց ու պատասխանի ժամանակ ասաց  «Իմ քայլը» խմբակցության պատգամավոր Բաբկեն Թունյանը վարչապետին հարցրեց այն մասին,  որ ապրիլի 5-ին կայանալիք հանրաքվեի վերաբերյալ որոշ կարծիքներ են հնչում, որ շուրջ 2 ամիս տևող քարոզարշավը կարող է բացասական ազդեցություն թողնել օրինակ՝ տնտեսական ակտիվության վրա: 

Պատասխանելով հարցին, թե արդյոք գործադիրն ունի մտահոգություներ այս հարցով, Նիկոլ Փաշինյանն ասաց․/

«2019թ. փորձը ցույց տվեց, որ Հայաստանի տնտեսության վրա ազդող հիմնական գործողը ապագայի  նկատմամբ ՀՀ քաղաքացիների ունեցած վստահությունն է: Ես ուզում եմ հավաստիացնել, որ այդ քարոզարշավի ընթացում քաղաքացիների վստահությունն ապագայի նկատմամբ կուժեղանա, ինչը նշանակում է, որ տնտեսական ակտիվությունն ավելի կմեծանա»,-ասաց նա։

Վարչապետը համոզված է, որ ոչ մի բացասական ազդեցություն չի ունենա քարոզարշավը տնտեսության վրա, ավելին՝ կունենա աշխուժացնող ազդեցություն:

Նիկոլ Փաշինյանը նշեց, որ քարոզարշավը չի կանգնեցնելու աննախադեպ չափի կապիտալ ծախսերը, որը կառավարությունը պլանավորել է, և դա լուրջ խթան է լինելու տնտեսական ակտիվացման համար: Անշարժ գույքի շուկայում տիրող ակտիվությունը նոր խթան է լինելու տնտեսության համար: «Մենք այս ողջ պրոցեսը պետք է տանենք բարձր տնտեսական, քաղաքական և հանրային տրամադրությամբ»,-նշեց վարչապետը:

«Ինչպես երևում է, արտերում ապրող բազմաթիվ քաղաքացիներ պատրաստվում են գալ այդ ընթացքում Հայաստան, որպեսզի քվեարկեն և մենք, կարծես՝ ստեղծում ենք տուրիզմի նոր տեսակ, որը կոչվում է «ընտրական տուրիզմ»»,-ասաց վարչապետը։ Դահլիճից հայտնեցին, որ արդեն կա այդպիսի տեսակ, ինչին Փաշինյանը պատասխանեց․ «Ափսոս, մեզ թվում է մենք ենք հորինել, ամեն դեպքում կլինի «ընտրական տուրիզմ»»։

Փաշինյանը կրկին կոչ արեց արտերկրում բնակվող  ՀՀ քաղաքացիներին գալ: «Մանավանդ հիմա, եվրոպական մի շարք երկրներից աներևակայելի ցածր գներով տոմսեր կարելի է գնել, իսկ նրանք, ովքեր չունեն ՀՀ քաղաքացիություն, կարող են «ընտրական տուրիզմից» զերծ չմնալ և գալ ու դիտարկել, թե ինչպես են ժողովրդավարական պրոցեսներն այստեղ զարգանում: Հաճելին օգտակարի հետ կհամատեղենք և նոր խթան կտանք տնտեսությանը»,-ասաց նա: