Առևտրի հաշվեկշիռը վատանում է. «Հայոց աշխարհ»

«Հայոց աշխարհ» թերթը գրում է. «Նախորդ երկու տարիներին գրանցված դրական տեղաշարժերից հետո Հայաստանի արտաքին առևտրի հաշվեկշիռը վերջին ամիսներին սկսել է վատանալ։ Պատճառը ներմուծման առաջանցիկ աճն է արտահանման նկատմամբ, ինչը արագորեն խորանում է՝ մեծացնելով արտաքին առեւտրաշրջանառության բացասական հաշվեկշիռը։ Արտահանման եւ ներմուծման տարբերությունը տարեսկզբի առաջին հինգ ամիսներին եղել է 933 մլն դոլար։

Դրա հետևանքով ներմուծումը վերստին կրկնապատիկ գերազանցել է արտահանմանը։ Այն դեպքում, երբ ոչ վաղ անցյալում տատանվում էր 1,8-ի սահմաններում։ Հայաստանի արտաքին առևտրի բացասական հաշվեկշիռը խորացել է հատկապես վերջին ամիսներին։ Դա պայմանավորված է առաջին հերթին արտահանման ցուցանիշների վատացմամբ։ Դադարել է հայաստանյան ապրանքների մատակարման ակտիվությունը արտաքին շուկաներ։

Պաշտոնական տվյալները վկայում են, որ ապրիլին գրանցվել է երկնիշ անկում։ Տարեսկզբի բարձր աճից հետո արտահանումը նվազել է գրեթե 13 տոկոսով։ Անկումը խորացել է մայիսին։ Այդ ամսին արտաքին շուկաներ հայաստանյան ապրանքների մատակարարումները ապրիլի համեմատ կրճատվել են ևս 5 տոկոսով։

Եթե մարտին Հայաստանից արտահանվել էր ավելի քան 206 մլն դոլարի ապրանք, ապա մայիսին այն կազմել է ընդամենը 171 միլիոն դոլար։ Այլ կերպ ասած, պակաս է արտահանվել 35 մլն դոլար։ Տարբերությունը հասնում է 17 տոկոսի։ Ապրիլ-մայիս ամիսներին Հայաստանից արտահանվել է ընդհանուր առմամբ 338 մլն դոլարի ապրանք։ Ներմուծումը կազմել է 749 միլիոն, ինչը 2,2 անգամով գերազանցել է արտահանմանը։ Տարեսկզբի համեմատ արտաքին առևտրի բացասական հաշվեկշռի խորացումը վերջին երկու ամիսներին ակնհայտ է. առաջին եռամսյակում արտահանման և ներմուծման տարբերությունը 1,8 անգամի սահմաններում էր։ Թեպետ վերջին շրջանում դանդաղել է նաև ներմուծման ծավալների աճը, այնուհանդերձ դա չի խանգարել, որ արտաքին առևտրի ցուցանիշները վատանան։

Վիճակագրական ծառայության տվյալներով, տարեսկզբի առաջին հինգ ամիսներին Հայաստանից արտահանվել է 935 մլն դոլարի ապրանք, ներմուծումը գերազանցել է 1 մլրդ 868 մլն դոլարը։ Արտաքին առևտրի, մասնավորապես արտահանման ոլորտում տեղի ունեցող դրսևորումները կապված են Հայաստանի տնտեսական գործընթացների հետ, որոնք վերջին շրջանում չեն փայլում ակտիվ զարգացումներով։

Ավելին՝ անկումային վիճակում է հայտնվել արդյունաբերությունը, որը արտահանման աճին նպաստող տնտեսության հիմնական ճյուղն է։ Ներքաղաքական վերջին իրադարձություններից հետո տնտեսության իրական հատվածում զարգացումներն այնքան էլ հարթ չեն ընթանում, եթե չասենք՝ ի հայտ են եկել բազմաթիվ խնդիրներ՝ կապված ինչպես կառավարության անգործության, այնպես էլ հասարակության տարբեր շերտերի կողմից ներկայացվող պահանջների հետ»:

Նյութն ամբողջությամբ կարդացեք «Հայոց աշխարհ»-ում: