Կառավարությունը վարկ է վերցնում դեռևս չընդունված նախագծի համար

Կառավարության այսօրվա՝ սեպտեմբերի 12-ի նիստում ներառված է ՀՀ պետական պարտքը ևս 102 մլն եվրոյով ավելացնելու հարցը:

Նախագծում մասնավորապես նշվում է.

«Հայաստանի Հանրապետության ու Վերակառուցման և զարգացման միջազգային բանկի միջև 2024 թվականի հուլիսի 25-ին ստորագրվել է «Համընդհանուր առողջապահական ծածկույթի ծրագրի իրականացում» վարկային համաձայնագիրը այսուհետ՝ համաձայնագիր:

102 մլն եվրո արժողությամբ վարկային ծրագրի նպատակներն են աջակցել Հայաստանի Հանրապետությանը, մասնավորապես` ՀՀ առողջապահության նախարարությանը, Առողջության համապարփակ ապահովագրության ներդրման ընթացքում, բարելավել առաջնային բժշկական օգնության որակը և իրագործումը, բարձրացնել երկրի առողջապահական ծախսերի արդյունավետությունը և նվազեցնել առողջապահական ծառայություններից օգտվելու ֆինանսական խոչընդոտները բնակչության շրջանում:

Վարկային ծրագրով տրամադրվող ֆինանսական միջոցները նախատեսվում է ուղղել Առողջության համապարփակ ապահովագրության շրջանակներում պետության կողմից սուբսիդավորվող շահառու խմբերի ապահովագրավճարների տրամադրմանը: Յուրաքանչյուր տարի տրամադրվող գումարների չափը և եղանակը ենթակա է համաձայնեցման Ֆինանսների նախարարության հետ` ամենամյա բյուջեի քննարկման շրջանակներում:

Կարևոր է նշել նաև, որ «Առողջության համապարփակ ապահովագրության մասին» օրենքի ընդունումից է կախված թե ծրագրի անհրաժեշտությունը, և թե սահմանված ցուցանիշներին հասնելը։

Ծրագրի ավարտի ամսաթիվը 2029 թվականի սեպտեմբերի 30-ն է»։