Հայկ Սարգսյանը դրսևորել է խուլիգանական վարքագիծ․ Ժուռնալիստների միությունը դատապարտում է

Հայաստանի ժուռնալիստների միությունը հայտարարություն է տարածել, որում նշվում է․

«Երեկ Ազգային ժողովում հերթական տհաճ միջադեպը տեղի ունեցավ իշխող «Իմ քայլը» խմբակցության պատգամավորի և լրագրողների միջև, երբ իշխանական պատգամավոր Հայկ Սարգսյանը «Yerevan Today» լրատվական կայքի լրագրող Սյուզի Բադոյանին հրելով, ապա վերջինիս ձեռքից միկրոֆոնը խլելով, ակնհայտորեն ու չարամիտ կերպով խոչընդոտելով լրագրողի՝ իր մասնագիտական գործունեությունն իրականացնելուն՝ մտավ իր աշխատասենյակ:

Հայաստանի ժուռնալիստների միությունը խստորեն դատապարտում է պատգամավորի նման գործելակերպը, փաստում, որ պատգամավորը դրսևորել է խուլիգանական վարքագիծ, ինչը պետք է արժանանար առնվազն իր թիմակիցների և խորհրդարանական մյուս խմբակցությունների պարսավանքին: Սակայն, ցավոք, պատգամավոր Հայկ Սարգսյանի վարքագիծը որևէ գնահատականի չարժանացավ: Անկախ նրանից, լրագրողի հնչեցրած հարցադրումը որքան է դուր գալիս կամ չի գալիս որևէ պաշտոնատար անձի, նա իրավունք չունի կոպտել, վիրավորել լրագրողին, սպառնալ, այդ թվում՝ հրել նրան կամ թույլ տալ անպատշաճ վարքագիծ՝ դրանով իսկ խոչընդոտելով լրագրողի մասնագիտական գործունեությանն ու ազատ խոսքի իրացմանը: Ավելին, պետական բյուջեի միջոցներից վարձատրվող պետական պաշտոնյաները, այդ թվում՝ պատգամավորները, պարտավոր են պատասխանել լրագրողների հարցերին, ինչն իրենց աշխատանքի մաս է կազմում, իրավունք չունեն բաժանել նրանց յուրայինների և ոչ յուրայինների, իսկ եթե համաձայն չեն հրապարակումների հետ, միշտ էլ կարող են դատական կարգով վիճարկել դրանք: Կոչ ենք անում հարգել լրագրողների աշխատանքը։

Դիմում ենք նաև մեր գործընկերներին։

Լրագրողներին կոչ ենք անում չտրվել սադրանքների, պահպանել լրագրողի էթիկայի կանոնները, մասնագիտական գործունեությունն իրականացնել բացառապես բարոյական և օրինական դաշտում»։

Հիշեցնենք, որ ԱԺ իմքայլական պատգամավոր, «Շիշ բռնող» մականունով հայտնի Հայկ Սարգսյանը խորհրդարանում դարձյալ փայլեց իր փողոցային վարվելակերպով։ Նախ՝ քաշում էր Yerevan.Today կայքի լրագրողի թևից, երբ վերջինս հարց էր տալիս Գագիկ Ջհանգիրյանին։ Հետո էլ, երբ լրագրողը հարցրեց, թե ինչու էր քաշում իր թևից, Հայկ Սարգսյանը հանդես եկավ պատգամավորին և ընդհանրապես՝ նորմալ մարդուն ոչ բնորոշ բառապաշարով, վիրավորեց, ապա խլեց միկրոֆոնը և մտավ սենյակ։ Այնինչ լրագրողն ընդամենը պահանջում էր ներողություն խնդրել իր մասնագիտական գործունեությունը խոչընդոտելու համար։