ԼՂ կարգավորման գործընթացի փուլերը և ՀՀ ներկայացուցիչների հայեցակարգային մոտեցումները.  «Լույս»-ի վերլուծությունը

«Լույս» հիմնադրամը հրապարակել է «Լեռնային Ղարաբաղի հակամարտության կարգավորման գործընթացի փուլերը, իրավիճակն ու հեռանկարները» վերլուծությունը:

Վերլուծության սկզբում ներկայացված է ՀՀ-ում 2018 թվականին տեղի ունեցած իշխանափոխությունից հետո իրավիճակը, Ադրբեջանի քայլերն ու հայկական կողմի հակակշիռները: Մասնավորապես, նշվում է, որ տեղի ունեցած իշխանափոխությունից  հետո ստեղծվել է մի իրավիճակ, երբ կարգավորման տեսակետից Արցախում ու Հայաստանի Հանրապետությունում առանցքային դերակատարություն են ստանձնել անձինք, ովքեր նախկինում այդ գործընթացի հետ որեւէ առնչություն չեն ունեցել կամ դուրս են եղել խնդրով անմիջականորեն զբաղվողների շրջանակից:

Այնուհետև հոդվածում առաջարկվում է որպես սկզբնական քայլ դիտարկել կարգավորման գործընթացի փուլերը, բացահայտել դրանց ընթացքում հայեցակարգային մոտեցումների էվոլյուցիան և արդյունքները, քննարկվող բանակցային փաստաթղթի էությունը, մարտահրավերներն ու հնարավոր զարգացումները։

Ուսումնասիրությունը բաժանված է հետևյալ մասերից.

1. Լևոն Տեր-Պետրոսյանի հայեցակարգային մոտեցումները
2. Ռոբերտ Քոչարյանի հայեցակարգային մոտեցումները
3. Սերժ Սարգսյանի հայեցակարգային մոտեցումները
4. Նիկոլ Փաշինյանի հայեցակարգային մոտեցումները
5. «Մադրիդյան սկզբունքների» էությունը
6. Անվտանգությունն ընդդեմ ինքնորոշմա՞ն
7. Կարգավորման գործընթացին առնչվող հիմնական հարցադրումները
8. Կարգավորման գործընթացի հեռանկարները

Որպես ամփոփում հոդվածում նշվում է, որ ԼՂ հակամարտության կարգավորման արդյունքը ոչ միայն կենսական նշանակություն ունի հայության ինքնության պահպանման և աշխարհում արժանապատիվ տեղ ունենալու տեակետից, այլև հայկական երկու պետությունների կենսունակության ամենալուրջ փորձությունն է: Հակամարտության կարգավորման արդարացի և բարենպաստ արդյունք հնարավոր է ակնկալել միան ամենօրյա բարդ, բազմավեկտոր մասնագիտական աշխատանքի դեպքում՝ դրանով ապահովելով բանակցային թիմի անհրաժեշտ բարձր պատրաստվածությունը:

Այդ թիմի հաջողությունը պայմանավորված է լինելու նաև ներքաղաքական իրավիճակով, որը պետք է զերծ լինի ազգային ինքնությունն ու միասնությունը պառակտող և քայքայիչ գաղափարների տարածման, քաղաքական կյանքում ներքին թշնամիների կերպարների ձևավորման մոտեցումներից, կառուցվի պետական կառավարման մարմիններում և գերակա ոլորտներում մասնագիտական հետազոտությունների միջոցով բացահայտված խնդիրների ու դրանց լուծումների ներուժ ունեցող գաղափարների վրա հիմնված ծրագրերի իրագործմամբ:

 Վերլուծությանն ամբողջությամբ կարող եք ծանոթանալ այստեղ: