Դուք ձեզ ձե՞ռ եք արել, սա սաբոտաժ է․ պատասխան եմ ստանալու բոլորիցդ․ Մեսչյան

Երևանի ավագանու Քաղաքաշինության և հողօգտագործման հարցերի և Մշակույթի, կրթության ու սոցիալական հարցերի մշտական հանձնաժողովների համատեղ  նիստին «Իմ քայլը» խմբակցության անդամ Իզաբելլա Աբգարյանը նշել է, որ պատմամշակութային հուշարձանների ցանկից որոշ շինությունների դեռ ձեռք չեն տվել, բայց բերում են անմխիթար վիճակի, որպեսզի հետո ասեն՝ կներեք, այնտեղ առնետանոց էր։ Դա հայտնի ձեռագիր է՝ շենքը հասցնում են վատ վիճակի, որ բնակիչներին ասեն՝ հիմա կբարեկարգենք։ 

«Շատ լավ հասկանում եմ, թե որտեղ է թաղված շան գլուխը, և ուզում եմ հասկանալ՝ էլ ո՞ր շենքն ենք մենք վաղը կորցնելու, թե՞ ի վերջո ցուցակը վերանայվելու է, սեփականատերերը, որոնք ձեռք են բերել պատմական կամ ճարտարապետական շինություններ, որևէ կերպ  պատասխանատվության են ենթարկվելու՝ այդ շենքերը բարձիթողի վիճակի հասցնելու համար»,- հարցրել է «Իմ քայլը» խմբակցության անդամը, նաեւ հետաքրքրվել, արդյո՞ք նոր կառավարությունը շարունակում է հին, արատավոր, կոռուպցիոն մեթոդներով կազմված ցանկերով առաջնորդվել, թե՞ աշխատում է, որ մասնագետները բազմակողմանի ուսումնասիրեն այդ շենքերը։

Փոխվարչապետ Տիգրան Ավինյանի աշխատակազմի ղեկավար Վարագ Սիսեռյանը խնդրել է իրեն էլ փոխանցել այդ ցանկը․

«Վստահ եմ, տիկին Թուխիկյանը պատրաստ է վերանայելու այդ ցանկը, եւ, կարծում եմ, ընդհանուր Երեւանի մասին եք ասում, ոչ միայն Ֆիրդուսի թաղամասի։ Ես լիովին համաձայն եմ ձեզ հետ։ Վստահ եմ, որ ԿԳՄՍ նախարարությունը կվերանայի, եւ ցանկը կլրամշակվի։ Ինչ վերաբեում է Ֆրդուսի թաղամասին, ես ուզում եմ ասել, որ ոչ, նույն ձեւով չենք գնում եւ չենք ուզում գնալ, բայց ասեմ, որ ահագին շենքեր արդեն քանդվել էին մինչեւ 2018 թվականի մայիսը։ Ես առաջին օրից մինչեւ վերջինը մասնակցել եմ Աֆրիկյան շենքերի քանդման դեմ, հակառակ, որ Երեւանում չեմ ծնվել, ինձ երեւանցի եմ զգում, եւ կիսում եմ ձեր ցավը։ Ինչու ասացի ոչ, նույն ճանապարհով չենք գնում, որովհետեւ, փաստացի Ֆիրդուսի 80-ի շուրջ բանակցում ենք, եւ 90 տոկոսով վստահ ենք, որ ծրագրից դուրս է բերվելու։ Տիգրան Մեծի շենքերը ծրագրից դուրս բերվեցին, գերակա շահից հանվելու են, որովհետեւ ծիծաղելի է հուշարձան-շենքը գերակա շահ ճանաչելը, այսինքն, ուղղակի անտրամաբանակ է։ Եվ ուզում եմ իմանալ, Ֆիրդուսիում նմանատիպ այլ շենքեր կա՞ն, թե՞ ոչ, խնդրահարույց շենքեր, չասեմ հուշարձան կամ ոչ հուշարձան, արժեք ներկայացնող շենք, քարեր։ Կարող եմ ասել նաեւ, դժբախտաբար, եթե Ֆիրդուսի 80-ը հանենք դուրս, եւ Թուֆենկյանի կողքի շենքը նաեւ, Հանրապետություն փողոցի վրա, որ էլի պահպանվելու է։ Կարծեմ էլ շենքեր չկան։ Շատ ներդրողներ հեղափոխությունից հետո են հայտնվել  եւ որոշել են այս ծրագրով ներդրում անել, հենց մեզ վստահելով։ Ներդորղները օլիգարխ չեն։ Այսինքն կան նորմալ ներդրողներ։ Մենք չենք գնում նախկինների, այդ բառը չեմ սիրում, ճանապարհով»:

Քաղաքաշինության կոմիտեի նախագահի Արմեն Ղուլարյանը  տեղեկացրել է, որ  հանձնախումբ է ստեղծվելու, այնպիսի փաստաթուղթ են ստեղծելու, որը զերծ կլինի կոռուպցիոն ռիսկերից և ընդունելի բոլոր կողմերի համար։

ԿԳՄՍ փոխնախարար Նարինե Խաչատուրյանը նշել է, որ մինչև հիմա  պահպանման պարտավորագիր չի ստորագրվել սեփականատիրոջ, վարձակալի հետ՝ հուշարձան շենքերի դեպքում։

Երևանի գլխավոր ճարտարապետ Արթուր Մեսչյանը տարակուսել է եւ հարցրել, թե ինչ կապ ունի քաղաքապետարանը հուշաձանների ցանկի հետ․ 

«Շատ զարմանալու հարց եմ տալու․ տղերք, մենք հիմա  Ֆիրդուսին կառուցապատելո՞ւ ենք, թե՞ ոչ։ Ինչ ասես լսեցի, նույնիսկ, որ քաղաքապետարանը մեղավոր է հուշարձանի ցանկը կազմելու հարցում։ Ի՞նչ կապ ունենք մենք դրա հետ ընդհանրապես։ Ամենակարևորը, ուզում ենք հասկանալ, ստրատեգիական առումով,  ի վերջո, Ֆիրդուսի նախագիծը մենք պետք է առա՞ջ տանենք, թե՞  երկրորդ շինհրապարակը պետք է ունենանք  ։ Խոսում եք Կոնդի մասին․ի՞նչ Կոնդ․ այսպիսի վերաբերմունքով, մակարդակով մենք պատրաստ ենք մոտենալ Կոնդի՞ն, դուք ձեզ ձե՞ռ եք առել։ Կոնդը ամենաբարդ նախագծերից մեկն է։ Եթե չենք կարողանում հասկանալ, թե Ֆիրդուսին ինչ ենք անելու, Կոնդին ո՞նց ենք մոտենալու։ Այդ 6 լոտի սեփականատերերը մեզ դատի են տալու եւ ջնջելու են բառի բուն իմաստով, որովհետև արդեն ահռելի ծախսեր են արել, դրան ո՞վ է պատասխան տալու։ Ո՞վ է մեղավոր, որ նախկինում արած կոնցեպտի վրա լոտեր են բաժանել, և կառուցապատողն այդ լոտերը գնել է, արդեն նախագծեր պատվիրել և  ճարտարապետներին կանխավճար է տվել։ Ո՞վ է փակելու այդ գումարները։ Բացի այդ, ասում են սա բիզնես չի, քաղաքականություն է։ Բիզնեսն ու քաղաքաշինությունը նույն բանն են։ Եկեք բոլորս հանգստանանք ու հասկանանք՝ ի վերջո, Ֆիրդուսին կառուցելո՞ւ ենք, թե՞ ոչ։ Եթե կառուցելու ենք, ապա ինչպե՞ս։ Այն կոնցեպտի հիման վրա, որ մշակվելու, բաժանվելու է լոտերի, և արվում են նախագծեր, թե՞ կասեցնում ենք աշխատանքը գրեթե երկու տարով, մտնում ենք դատական այս խնդիրների մեջ, նորից փաթեթ ենք կազմում, մտնում ենք մրցույթի մեջ ու 3-4 տարի հետո շինարարություն սկսում։ Տղերք, սա սաբոտաժ չի՞։ Ես սա բառի բուն իմաստով սաբոտաժ եմ համարում։ 10 հազար հոգի շինարար եւ 250 միլիոն դոլարի ներդրում, 10 հազար հոգի տուն է պահելու, 3 տարին քիչ ժամկետ է՞, եւ ասում են դա երկարատև ծրագիր չի։ 3 տարին երկարատեւ չի՞։ Շինարարությունն էլ որպես տնտեսության լոկոմոտիվ, չարժի՞, որ ուշքի գա։ Որպես գլխավոր ճարտարապետ՝ պատասխան եմ ստանալու բոլորիցդ։ Ես ուզում եմ իմանալ՝ կառուցելու ենք, թե՞ ոչ»։

Վարագ Սիսեռյանը պատասխանել է, որ ծրագիրն իրականացվելու է՝ խնդիրներին լուծում տալով։