Սևանից ոչ մի լիտր ջուր չենք վերցրել, բայց մակարդակը ավելի ցածր է, քան անցած․ Էրիկ Գրիգորյան

Կառավարությունն իր այսօրվ՝ ապրիլի 23-ի նիստում որոշում կայացրեց սահմանել Հյուսիսային և Սևանի ջրավազանային կառավարման տարածքներում սակավաջրություն:

Հարցը ներկայացրեց շրջակա միջավայրի նախարար Էրիկ Գրիգորյանը, ով նշեց, որ կառավարության որոշման նախագծի մշակման անհրաժեշտությունը բխում է ՀՀ ջրային օրենսգրքի 92-րդ հոդվածի պահանջներից: Նրա խոսքով, 2014-ից արդեն հայտարարված է սակավաջրություն ևս երեք ջրավազաններում՝ Արարատյան, Հրադզդանի և Ախուրյանի:

Վերջինիս մշակման համար հիմք է հանդիսացել Հիդրոօդերևութաբանության և մթնոլորտային երևույթների վրա ակտիվ ներգործության ծառայության կողմից հիդրոդերևութաբանական վերլուծության արդյունքում սակավաջրության վերաբերյալ ներկայացված պաշտոնական տեղեկատվությունը, ինչպես նաև հաշվի է առնվել 2014 թվականի սեպտեմբերի 18-ի «Արարատյան, Հրազդանի և Ախուրյանի ավազանային կառավարման տարածքներում սակավաջրության և երաշտի մասին» որոշումը:

Ներկայացված տեղեկատվության համաձայն՝ կանխատեսումները կազմելիս հնարավորինս հաշվի են առնվել վարարումների հոսքը ձևավորող բոլոր գործոնները։ Հաշվի առնելով արդեն իսկ դիտված և կանխատեսվող հիդրոօդերևութաբանական պայմանները կանխատեսվել է, որ գետերի մեծ մասում 2020թ. գարնանային վարարումների հոսքի ծավալները և առավելագույն ելքերի մեծությունները սպասվում են նորմայի 50-80%-ի սահմաններում, ընդ որում գետերի մեծ մասում վարարումների հոսքի ծավալների ապահովվածությունները կանխատեսվում են 80-85%-ի սահմաններում։ Համաձայն ՀՀ ջրային օրենսգրքի 1-ին հոդվածի նման իրավիճակը սահմանվում է որպես սակավաջուր:

Նախագծով տրվել են սակավաջրություն հայտարարվելու դեպքում ջրային օրենսգրքով պահանջվող կարգավորումներ՝ որոշմամբ նշված տարածքներում ջրային ռեսուրսների օգտագործման և ջրային ռեսուրսների հետ կապված գործողությունների սահմանափակումներ և չափավորումներ, ինչպես նաև սահմանվել են պետական կառավարման մարմինների նկատմամբ այլ համապատասխան պահանջներ։ Հյուսիսային և Սևանի ջրավազանային կառավարման տարածքներում սահմանված սակավաջրությունը կարող է վերացվել շրջակա միջավայրի նախարարի ներկայացրած առաջարկության հիման վրա:

Նախագծի  ընդունումը հնարավորություն կտա սակավաջրության հետևանքով ստեղծված իրավիճակում կանխել ջրօգտագործողների շահերի բախումները և մեղմել ջրային ռեսուրսների վրա ակնկալվող բացասական ազդեցությունը` հատկապես ջրապահանջի բավարարման ժամանակ, ինչպես նաև գտնել համապատասխան լուծումներ՝ առավել արդյունավետ օգտագործելու սահմանափակ ջրային ռեսուրսները:

Վարչապետի հարցին, թե գյուղացիների համար սա ի՞նչ է փոխում, նախարարը պատասխանեց. «Սրանով մենք ոռոգողներին, գյուղացիներին լրացուցիչ երաշխիքներ ենք տալիս, քանի որ ջուրն օգտագործվելու է ըստ առաջնահերթությունների»:

Նա նաև տեղեկացրեց, որ այս տարի Արփա-Սևանով բավական ջուր են տեղափոխել Սևանա լիճ. «Սևանից դեռևս ոչ մի լիտր ջուր չենք վերցրել, բայց մակարդակն ավելի ցածր է, քան անցած և նախանցած տարի: Այս օրերին տեղումների հաշվին միգուցե ջուր կլինի, ցուցանիշները կլավանա, բայց այն 4 հիմնական ջրամբարները, որոնք Արարատյան դաշտի համար է օգտագործվում, իրենք այս պահին շատ ավելի ցածր մակարդակի վրա են: Հույս ունենք, որ այս որոշման կիրառման կարիքը չի լինի, սա կանխարգելիչ քայլ է»,-ընդգծեց Գրիգորյանը: