Սերժ Սարգսյանը 2017-ին մոտ 900 անձի մեդալ, շքանշան, պետական մրցանակ ու շնորհակալագիր է տվել

2017-ին նախագահի աշխատակազմին հատկացվել է 4 մլրդ 888 մլն դրամ, ճշտված պլանը կազմել է 4 մլրդ 626 մլն դրամ: Փաստացի ծախսը կազմել են 3 մլրդ 998 մլն դրամ: Բյուջեի կատարողականը կազմել է 83,93 տոկոս: Այս մասին ԱԺ-ում քննարկումների ժամանակ հայտարարեց նախագահի աշխատակազմի ղեկավարի տեղակալ Էմիլ Տարասյանը:

Նա ասաց, որ 2017 թվականի ընթացքում կատարված ծախսի արդյունքում առաջացել են 619 մլն դրամի տնտեսումներ: Կրճատվել է 81 հաստիքային միավոր, գործուղումների ծախսերից տնտեսվել է 97 մլն դրամ, էներգետիկ ծառայություններով` 35 մլն դրամ:

Նախագահականից օտարվել է 20 ծառայողական մեքենա:

Նախագահը շքանշաններով, մեդալներով է պարգևատրել և կոչումներ շնորհել 727 անձանց, նախագահի մրցանակներ են շնորհվել 92 անձի, նախագահի պետական մրցանակներ են շնորհվել 12 անձի, նախագահի շնորհակալագրերով է պարգևատրվել 38 անձ:

Էմիլ Տարասյանը չկարողացավ պատասխանել պատգամավորի հարցին, թե որքան գումար է ծախսվել «նոր, անլիազոր նախագահի» նստավայրի վերակառուցման, նորոգման համար:

Նախագահի աշխատակազմը, համաձայն ղեկավարի տեղակալի, համալրված է 50 տոկոսով: