Ուկրաինան անօդաչուներով հարվածել է ՌԴ մի քանի մարզի

Գիշերը դրոնները հարվածել են Բելգորոդին։ Տեղի ԶԼՄ-ները հրապարակել են լուսանկարներ քաղաքի կենտրոնի վնասված օբյեկտներից։ Նահանգապետ Վյաչեսլավ Գլադկովը տեղեկացրել է, որ Բելգորոդի եւ Բելգորոդի շրջանի օդում խփվել է մի քանի օդային թիրախ, զոհվել է մեկ մարդ, վիրավորվել երկու խաղաղ բնակիչ։

Վոլգոգրադի մարզում ուժեղ հրդեհ է սկսվել Դոնի Կալաչ քաղաքի նավթաբազայում, այրվել է էլեկտրաենթակայանը Ֆրոլովո քաղաքում, վկայում է հրապարակված վիդեոն։ Այս օբյեկտներում «անօդաչուների բեկորների մասին» տեղեկությունները հաստատել է նահանգապետ Անդրեյ Բոչարովը։ Նավթաբազայի հրդեհը շարունակում են մարել։

Աստրախանի նահանգապետ Իգոր Բաբուշկինը առավոտյան տեղեկացրել է անօդաչուների «զանգվածային փորձի» մասին մարզի հյուսիսում, որը, նրա պնդմամբ, հաջողությամբ «հետ է մղվել»։

Ռոստովի նահանգապետ Վասիլի Գոլուբեւը եւս հայտնել է «զանգվածային գրոհի» մասին, որն սկսվել է գիշերը ժամը մոտ 2-ին։ Ռոդիոնովո-Նեսվետայի շրջանում այրվել են էլեկտրակայանի երկու տրասնֆորմատորներ, իսկ Դոնի Ռոստովում բեկորների ընկնելու վայրում այրվել է չոր բուսականությունը, գրել է նահանգապետը թելեգրամում։

Վորոնեժի նահանգապետ Ալեքսանդր Գուսեւը տեղեկացրել է ինքնաթիռի տիպի մի քանի դրոնների ոչնչացման մասին՝ նշելով, որ ավերածություններ եւ տուժածներ չկան։ Կուրսի նահանգապետի պաշտոնակատար Ալեքսեյ Սմիրնովը թելեգրամում գրել է չորս խփված անօդաչուի մասին։