Կա հասարակական դիմադրություն, որն այս իշխանությանը ծանր ապտակներ է հասցնելու. Տիգրան Աբրահամյան

Մեր պատմության վերջին ժամանակահատվածը բաժանվեց երկու փուլի, առաջին՝ արցախյան 44 օրյա պատերազմն է, երբ ժողովուրդը սկսեց հասկանալ, թե Հայաստանի ներսում ինչ ուժերի և ում հետ գործ ունի։ Այս մասին ասուլիսում հայտարարեց «Պատիվ ունեմ» խմբակցության պատգամավոր Տիգրան Աբրահամյանը:

Նա նկատեց, որ հասարակության մեջ ցավալիորեն կածիք էր ձևավորվել, թե խնդիրն Արցախի մեջ է, և այն տալով բոլոր խնդիրները կլուծվեն:

«Նույնիսկ դրա համար պետական ուժեղ քարոզչամեքենա մտավ խաղի մեջ՝ ցույց տալու համար, որ Արցախն իրականում մերը չէ՝ Ադրբեջանինն է»,- նկատեց պատգամավորը։

Ընդդիմադիր պատգամավորի խոսքով, նորագույն ժամանակների երկրորդ հանգրվանային փուլը մայիսի 12-ին և նոյեմբերի 16-ին Ադրբեջանի ագրեսիան էր Սյունիքի և Վայոց Ձորի ուղղությամբ, որոնց արդյունքում նույնիսկ պաշտոնական տվյալներով 41 քառ. կմ անցել է Ադրբեջանի վերահսկողության տակ, կորցրել ենք կարևոր դիրքեր, բարձունքներ, հենակետեր:

«Սրանք ոչ թե Արցախի դեմ ուղղված ագրեսիա էին, այլ Հայաստանի դեմ էին և ադրբեջանական զինուժը ոչ միայն չի նահանջում, այլ այդ տարածության մեջ շատ ավելի լկտի պահվածք են դրսևորում»,-ասաց նա։

Աբրահմյանի խոսքով, ստեղծված իրավիճակը երկրում չէր կարող անդրադարձ չունենալ ՏԻՄ ընտրությունների վրա։

«Կան համայնքներ, որտեղ իշխող ուժը հաղթանակ է տարել, բայց նրա ընտրացուցակներում գաղափարական առումով չկա թիմ, կան մարդիկ, որոնք փորձել են ստեղծված իրավիճակում իրենց կողմը քաշել վերմակը, ընդունել իշխող ուժի պայմանները»,-ասաց Աբրահամյանը։