Նվիրաբերության գումարները արդյո՞ք այդ հաշվեհամարի հետ առնչություն ունեն. «Հայաստան» խմբակցություն

«Հարգելի գործընկերներ

Հիշեցնենք, որ օրեր առաջ հայտարարություն էինք տարածել «Հայաստան» համահայկական հիմնադրամի կողմից կառավարությանը փոխանցված գումարների օգտագործման հարցով քննիչ հանձնաժողովի աշխատանքի մասին և տեղեկացրել, որ այս փուլում պահաջել ենք կառավարությունից, ինչպես նաև դիմել ենք  «Հայաստան» համահայկական հիմնադրամին՝ անհրաժեշտ տեղեկատվություն ստանալու համար:

Ստորև ներկայացնում ենք կառավարությանը և «Հայաստան» համահայկական հիմնադրամին ուղղված հարցերը:

Կառավարությանը՝

1. Այն պետական մարմինների անվանումները և պաշտոնատար անձանց անունները, որոնք ներկայացրել են և/կամ հիմնավորել են նվիրաբերության կարգով նշված գումարը հիմնադրամից ներգրավելու առաջարկը (առկայության դեպքում), ինչպես նաև առաջարկը և դրա քննարկումը արձանագրող փաստաթղթերը (տեսաձայնագրություններy): Այս կետի ներքո տեղեկատվությունը պետք է պատասխանի նաև հարցին. թե ինչ՞ հիմնավորմամբ է որոշվել (առաջարկվել) հիմնադրամի միջոցներից ներգրավել նվիրատվություն (նվիրաբերություն):

2. Նվիրատվության (նվիրաբերության) պայամանագրերը:

3. Գանձապետական հաշվեհամարը բացելու, ինչպես նաև նվիրաբերության նշված գումարը գանձապետական հաշվեհամարին փոխանցելու (հաշվեհամարին մուտքագրելու) վերաբերյալ բոլոր իրավական ակտերը (նորմատիվ, անհատական և ներքին), ինչպես նաև վարչական ակտերը, նամակագրությունները, հանձնարարականները և/կամ այլ փաստաթղթերը:

Այս կետով ներկայացվող տեղեկատվության ներքո պետք է հստակ պատասխանել նաև հետևյալ հարցերին. Արդյո՞ք գանձապետական այս հաշվեհամարը բացվել է բացառապես նշված նվիրաբերության համար, հիմնադրամն ունի՞ Հայաստանի Հանրապետության գանձապետարանում բացված գանձապետական հաշիվ, և եթե այո, ապա արդյո՞ք այդ հաշվեհամարից գումարներ են ելքագրվել կառավարության համար:

4. Գանձապետական նշված (նվիրաբերության գումարները մոջտքագրելու համար բացված)հաշվեհամարի  շարժը նկարագրող տեղեկանք (քաղվածք հաշվից)՝ հաշվեհամարի բացման պահից մինչև սույն կետով պահանջվող տեղեկատվություն տրամադրելու օրը: Սույն կետում  նշված տեղեկությունը պետք է ներառի նաև հաշվեհամարի յուրաքանչյուր շարժի (մուտքի և ելքի) համար հիմք հանդիսացող առաջնային (սկզբնական) փաստաթղթերի տվյալները, ինչպես նաև շարժի արդյունքում ֆինանսական միջոցների ելքի հանրագումարը՝ տարանջատված մինչև 2020թ. դեկտեմբերի 31-ը և 2021 թվականին՝ ըստ ամիսների:

5. Տեղեկանք գանձապետական նշված հաշվեհամարից 300 մլն. դրամ և ավելի մեկանգամյա կամ միմյանց փոխկապակցված փոխանցումների վերաբերյալ՝ նշելով գումարի մեծությունը, ծրագրի անվանումը և ստացողին:

6. Տեղեկատվություն այն  ծրագրերի վերաբերյալ, որոնք իրականացնելու համար ծախսվել են հատկացված միջոցները՝ ներկայացնելով ծրագրի կատարման պատասխանատու պետական մարմնին, ծրագրի նկարագիրը, անվանումը, ծրագրով նախատեսված ֆինանսական և ոչ ֆինանսական, ինչպես նաև կատարողականի ցուցանիշները, ծրագրի սկզբի և ավարտի ամսաթվերը:

Այս կետի պահանջի ներքո պետք է ներկայացնել նաև տեղեկություն  այն մասին, թե մինչև նշված ծրագրի հաստատումը արդյո՞ք համանման ծրագիր (ծրագրեր), ծախսեր նախատեսվել են ՀՀ 2020թ. պետական կամ տեղական ինքնակառավարման բյուջեներով: Եթե առկա են համընկնումներ, հարկ է պատասխանել նաև, թե ի՞նչ ուղղություններով (նպատակներով) են ծախսվել  (վերաբաշխվել) բյուջեներում նախատեսված միջոցները:

7. Տեղեկություն նախորդ կետում նշված ծրագրերի իրականացման հսկողության համակարգի մասին՝ ծրագրի նախատեսված նպատակների և արձանագրված արդյունքների համապատասխանության վերաբերյալ հսկողություն իրականացնող մարմնի և պաշտոնատար անձի հաստատումները:

8. Նվիրաբերության պայմանագրերով ստացված միջոցների վերաբերյալ «Հայաստան» համահայկական հիմնադրամին ներկայացված հաշվետվությունները, դրանց վերաբերյալ տրված բացատրությունները, մասնագետների  և/կամ փորձագետների, ինչպես նաև աուդիտորական կազմակերպության եզրակացությունները:

«Հայաստան» համահայկական հիմնադրամին՝

1. «Մենք ենք մեր սահմանները» համազգային դրամահավաքի անցկացման նպատակները, դրամահավաքի վերաբերյալ հրապարակային հայտարարությունները, դրամահավաքին մասնակցած անձանց (ֆիզիկական և իրավաբանական) քանակը:

2.  «Հայաստան» համահայկական  հիմադրամի կանոնադրությունը՝ բոլոր   փոփոխություններով և լրացումներով:

3. Հիմնադրամի հոգաբարձուների խորհրդի կազմը և դրանում փոփոխությունները՝ նվիրաբերություն կատարելու որոշման կայացման պահից մինչև սույն հարցման պատասխանի տրամադրման օրը:

4. Հիմնադրամի հոգաբարձուների խորհրդի կողմից հաստատված հիմնադրամի գույքի տնօրինման կարգը, ինչպես նաև հոգաբարձուների խորհրդի կողմից՝  նվիրատվություն (ներ) կատարելու մասին իր որոշումների կատարման ընթացքի վերահսկման ընթացակարգը և փաստացի իրականացված վերահսկողության արդյունքները:

5. Նվիրատվություն (նվիրաբերություն) կատարելու որոշման համար հիմք հանդիսացած հանգամանքները:

6. Նվիրաբերություն կատարելու մասին հոգաբարձուների խորհրդի բոլոր նիստերի արձանագրությունները: Սույն կետի ներքո ակնկալվող տեղեկատվությունը պետք է պատասխանի նաև հարցերին. Իրավասու էր արդյո՞ք հիմնադրամը իրականացնելու նույն ծրագրերը, ինչը նվիրաբերության գումարներով  իրականացրել է կառավարությունը, քննարկվել է արդյո՞ք կառավարության կողմից իրականացվելիք ծրագրերը հիմնադրամի կողմից անմիջականորեն իրականացնելու տարբերակը: Եթե այո, ապա ի՞նչ հիմնավորմամբ է հիմնադրամը հրաժարվել դրանք անմիջականորեն իրականացնելուց:

7. Հիմնադրամն ունի՞ Հայաստանի Հանրապետության գանձապետարանում բացված գանձապետական հաշիվ: Նվիրաբերության գումարները արդյո՞ք այդ հաշվեհամարի հետ առնչություն ունեն:

8. Տեղեկատվություն 5-րդ կետում նշված նիստերի անցկացման վերաբերյալ խորհրդի անդամներին ծանուցելու, նիստերի օրակարգերը, դրանցոււմ ներառված հարցերի վերաբերյալ անհրաժեշտ նյութերը խորհրդի անդամներին (անվանական) տրամադրելու մասին: Նվիրատվությանը (ներին) կողմ քվեարկած խորհրդի անդամները:

9. Նվիրատվության նպատակների՝ հիմնադրամի կանոնադրությանը համապատասխանելու վերաբերյալ իրավասու մարմնի եզրահանգումը (փորձագիտական եզրակացության դեպքում նաև դա):

10. Կառավարության կողմից նվիրատվության գումարի փաստացի ծախսման ուղղությունները և արձանագրված արդյունքները, ինչպես նաև նվիրաբերության և կառավարության կատարած ծախսերի վերաբերյալ փորձագիտական, մասնագիտական և աուդիտորական եզրակացությունները»: