Այս դավաճանին ձայն տալով դուք թույլ եք տալու, որ շարունակվի պատերազմը․ Սերժ Սարգսյան

Այս դավաճանին ձայն տալով դուք համաձայնելու եք Արցախի, իսկ հետագայում Սյունիքի հանձնմանը, թույլ եք տալու, որ շարունակվի պատերազմը: Այս մասին «Պատիվ ունեմ» դաշինքի նախընտրական քարոզչության պաշտոնական մեկնարկի արարողության ժամանակ նշեց ՀՀ երրորդ նախագահ, ՀՀԿ ղեկավար Սերժ Սարգսյանը։

«Արդեն 27 օր է մեր ինքնիշխան տարածքում են գտնվում թշնամական զորամիավորումները: Ամեն օր հովիվներ ու զինվորներ են գերեվարվելու, թշնամին նոր գյուղեր ու ավաններ է գրավելու: Ձեզ չեն հարգելու ոչ դրսում, ոչ ներսում, անարգելու են: Մենք դառնալու ենք իզգոյ պետություն ու նաեւ իհարկե, իզգոյ ժողովուրդ, որի հետ ոչ ոք չի ցանկանում հաշվի նստել: 

Դիմում եմ նաեւ մեր այն հայրենակիցներին, որոնք հիասթափված են ու անտարբեր: Հայեր, իմ սիրելի հայեր, դուրս եկեք այդ անտարբերության մահաբեր ու կործանարար թմբիրից: Կոչ եմ անում մեր բոլոր համակիրներին, օգտագործեք այս քարոզարշավը դեռեւս նիկոլիզմով ախտահարված բարեկամների, ընկերների հետ զրուցելու, նրանց հարցերին պատասխանելու համար:

Օգնեք նրանց, նրանք ձեր քույրեն ու եղբայրներն են, եղեք համբերատար ու անկեղծ: Մենք մեր հերոս նահատակներին իրենց առողջությունը  հայրենիքի զոհասեղանին դրած զինվորներին, սպաներին ու նրանց սերունդներին հաղթանակած ու հզոր հայրենիք ենք պարտք: Իսկ պարտք փակելը նորմալ մարդու համար արժանապատվության հարց է: Պատվի հարց է, իսկ մենք պատիվ ունենք: Աստված զորավիգ բոլորիս»,-ասաց նա: