Բայդենի՝ Հայոց ցեղասպանության ճանաչումը բացառապես հայ համայնքի աշխատանքի արդյունքն է. միջազգայնագետ

«Բայդենի կողմից Հայոց ցեղասպանության ճանաչումը բացառապես հայկական համայնքի ակտիվ աշխատանքի արդյունքն է»,- Yerevan.Today-ի հետ զրույցում ասաց միջազգայնագետ Սուրեն Սարգսյանը:

«Կարծում եմ, որ համայնքն իրոք բավականին լուրջ աշխատանք է տարել: Հաշվի առնելով միջազգային իրավիճակը, թուրք-ամերիկյան հարաբերությունները, նաև Թուրքիայի վարքագիծը, մեր համայնքը շատ պրոֆեսիոնալ լոբբիստական աշխատանք տարավ, վերջին մի քանի օրերի ընթացքում մեկ միլիոնից  ավելի  ստորագրություն հավաքվեց և ուղարկվեց Սպիտակ տուն՝ պահանջելով Բայդենից ճանաչել Ցեղասպանությունը: Էլի համայնքի ջանքերով Սենատի և ներկայացուցիչների պալատ 100-ավոր անդամներ ստորագրահավաք կազմակերպեցին՝ Բայդենից պահանջելով ճանաչել Ցեղասպանությունը: Մի խոսքով,  բավականին ակտիվ և հետևողական աշխատանքի արդյուքնում ստացանք այս ճանաչումը»:

Ինչ վերաբերում է հարցին, թե այս ճանաչումն առարկայական ինչ է տալու մեզ, Սուրեն Սարգսյանը պատասխանեց. «Սրա առարկայականությունը բացառապես պայմանավորված է մեր իշխանությունների կարողություններով, որովհետև սա նաև լրջագույն քաղաքական նախադեպ է, որպեսզի մենք կարողանանք շատ ակտիվ կիրառել որպես նախադեպ մեր արտաքին քաղաքականության մեջ, նաև Թուրքիայի նկատմամաբ ճնշումներ գործադրենք»:

Իսկ թե ինչ ինչպես է գնահատում այս առումով մեր իշխանությունների կարողությունները, Սարգսյանը պատասխանեց. «Զրոյական»: