Հայաստանը շատ լավ գիտի խաղաղության արժեքը, մենք թշնամիներ չենք փնտրում. Արա Այվազյան

ԱԺ արտաքին հարաբերությունների մշտական հանձնաժողովի նիստում Հայաստանի Հանրապետության կառավարության ծրագրի 2020 թվականի կատարման ընթացքի և արդյունքների մասին զեկույցի ներկայացման ժամանակ ՀՀ արտաքին գործերի նախարար Արա Այվազյանը նշել է, որ Հայաստանի արտաքին քաղաքականությունն այսօր, առավել քան երբևէ, լինելու է պրագմատիկ և ճկուն, ամեն ինչ արվելու է, որ Հայաստանի շուրջ ձևավորվի կայուն անվտանգային մթնոլորտ: 

Նախարարը նաև նշել է. «Բնականաբար վերջին պատերազմի արդյունքները ստիպում են չափազանց պրագմատիկ մոտենալ Հայաստանի արտաքին քաղաքական օրակարգին: Եվ մեր առաջին խնդիրը հատկապես հիմա պետք է լինի Հայաստանի անվտանգային օրակարգը և Հայաստանի շուրջ բարենպաստ մթնոլորտի ձևավորումը:

Նախարարը հիշեցրեց համավարակի պայմաններում ճամփորդելու սահմանափակումների մասին, սակայն այս ընթացքում ինքը մի շարք այցելություններ է ունեցել: Զուգահեռաբար շատ ակտիվ ներգրավվածություն է ապահովում հեռավար ձևաչափերում տարբեր գործընկերների հետ. «Բայց Հայաստանը, առավել քան որևէ երկիր, շատ լավ գիտի խաղաղության արժեքը, և մենք թշնամիներ չենք փնտրում: Մենք ամեն ինչ անելու ենք, որ Հայաստանի Հանրապետության շուրջ ձևավորվի իսկապես կայուն անվտանգային մթնոլորտ»: