Կոչ ենք անում միավորվել այս ազգակործան իշխանության դեմ և մերժել նրանց վերահսկողության ներքո իրականացվող ամեն մի քայլ

Մի շարք կազմակերպություններ հայտարարությամբ են հանդես եկել, որը ներկայացնում ենք ստորև․

Հայրենակիցնե՛ր.

Հայրենիքը կործանման եզրին է:

Ներկայիս իշխանությունների հայրենադավ և ազգադավ գործունեության պատճառով կորցրել ենք գրեթե ողջ Արցախը, անխնայորեն <<մկրատվում>> են ՀՀ պետական սահմանները, նենգ դավաճանությամբ կազմալուծվել է Հայոց բանակը՝ իր անդառնալի մարդկային տասնյակ հազարավոր կորուստներով և ռազմատեխնիկական բազայի փոշիացմամբ:

Պետության ներքին և արտաքին քաղաքականության մեջ համատարած քաոս է:

Անգործության են մատնվել պետական գերատեսչությունները, արտաքին աշխարհում ոչ լրջմիտ վերաբերմունք է ձևավորվել Հայաստանի Հանրապետության և հայ ժողովրդի նկատմամբ: Կորսված են ազգային ինքնասիրությունն ու արժանապատվությունը:

Իրականությունը սթափ գնահատելու, ժողովրդին ճշմարտությունը ազնվորեն և շիտակ ներկայացնելու փոխարեն՝ ներկա վարչակարգը որդեգրել է ստի, կեղծիքի, աճպարարության մի քաղաքականություն, որի նպատակը սեփական ապաշնորհության, հակազգային գործունեության կոծկումը և հոգևարքի մեջ հայտնված իրենց տխրահռչակ իշխանության երկարակեցության ապահովումն է:

Իշխանական քարոզչությունն ուղղորդված է մարդկանց զգացմունքներին, բնազդներին և ոչ թե բանականությանը: Ճարպկորեն մեզնից խլվում են Հայոց պատմությունը, մշակույթը, կրոնը, հավաքական հիշողությունը, որի հետևանքով հայ ժողովուրդը վերածվում է ամբոխի:

Ամենայն հայոց բանաստեղծը ժամանակին բանաձևել էր ժողովրդի և ամբոխի տարբերությունը. <<Ժողովուրդը իմաստուն է, ամբոխը՝ հիմար: Ժողովուրդը ծանր է, ամբոխը՝ թեթև: Ժողովուրդը մեծահոգի ու բարի է, ամբոխը՝ դյուրագրգիռ, վտանգավոր, չար: Ժողովուրդը աշխատանք է սիրում, ամբոխը՝ թալան...>>:

Մի՞թե մեզ համար գերադասելի է ամբոխացումը:

Հայրենակիցնե՛ր.

Մենք՝ մտավորականներս, մերժում ենք հայ ժողովրդի ամբոխացումը, կոչ ենք անում միավորվել այս ազգակործան իշխանության դեմ և մերժել նրանց վերահսկողության ներքո իրականացվող ամեն մի քայլ:

Պետության վերածնության միակ ճանապարհը ազատ, արդար և թափանցիկ ընտրություններն են, որի երաշխավորը, սակայն, այս իշխանությունը չի կարող լինել:

Ուրեմն՝ մեզ անհրաժեշտ են ընտրություններ՝ առանց այս հայրենադավ և ազգադավ իշխանության ու նրա վերահսկողության:

<<Ձայն Հայրենեաց>> նախաձեռնություն

<<Մ. Ի. Տ. Ք. Ազգային Խորհուրդ>>

<<Հայ Ազգային ճակատ>>

<<Ձայն Հայրենեաց>>-ի Շիրակի մարզի մասնաճյուղ

<<Ձայն Հայրենեաց>>-ի Լոռու մարզի մասնաճյուղ

<<Ձայն Հայրենեաց>>-ի Վայոց ձորի մարզի մասնաճյուղ